-Арчалылар 849нчы платформага барган. Бу поезддан соң, расписание буенча 6401 нче санлы электричка килергә тиеш. Аларның ниятләре шуңа утырып, Казанга китү булгандыр, - ди Горький тимер юлының Казан регионы буенча җитәкче урынбасары Александр Черемнов. - Алар тимер юлда үз-үзеңне тоту кагыйдәләрен тупас бозган. Моның буенча аңлату эшләрен даими алып барабыз. Тимер юл - иң куркыныч зона. Әмма моны күпләр аңлап бетерми.
Иртәнге караңгылыкны ерып эшкә ашыксалар да, ниятләренә ирешә алмый кала алар. Поездны күрергә караңгылык комачаулыймы, аның сигналын ишетмиләрме, өч юлдаш - 57 яшьлек Илдар Гималиев, 40 яшьлек Лариса Калиновская һәм 41 яшьлек Наталья Калачова бер мизгелдә җан бирә.
Илдар абый белән Наташаның балалары инде кул арасына керер яшьтә. Ә менә Ларисаның 4 яшьлек улы ятим кала.
Бер кайгы икенчесен тартып тора диләр. Әле ике атна элек кенә Илдар абый әнисе Равилә апаны җирләгән булган. Хатыны Резидә ханым белән матур гомер иткәннәр. Биш айдан бергә яши башлауларының 35 еллыгын үткәрергә җыенганнар. Тик барлык хыяллар чәлпәрәмә килгән.
Илдар абый һөнәре буенча шофер. Озак еллар Арча совхозында эшләгән. Шуннан фатир да биргәннәр үзенә. Анда эш беткәч дә тик ятмаган, тирә-якта гына булмагач, Казанга йөреп эшләгән. Кичә дә ул иртән-иртүк чыгып киткән. Тик озак та үтми, гаиләсенә кайгылы хәбәр килеп ирешә.
Илдар Гималиев соңгы өч елда "Казан" кунакханә комлексында урам җыештыручы булып эшләгән. Аңа кадәр дүрт ел шунда ук каравылда торган.
Җитәкчесе Инил Шәймуллин аны "типичный Арча егете" дип бәяләде. Җаваплы, күндәм.
-Аның кебек кешеләр сирәк. Тәртипле, эчми-тартмый. Кулы теләсә нинди эшкә ята. Кушканны көтми, сорап та тормыйча эшләп куя иде. Ул безнең уң кулыбыз булды. Электрик булмаса да, йөгереп аңа киләбез. Сантехникны да ул алыштыра. 7 яртыга килеп, башка хезмәткәрләр килгәнче, бар җирне ялт иттереп куя иде. Үз эшләрен бетергәч, кичкә кадәр калмый, 2ләрдә кайтып китә. Ашыгыч эш булса инде, бер киреләнүсез тоткарланып, кичке поезд белән генә кайта.
Мин аның гаиләсен дә "заочно" беләм. Бик тәмләп, яратып сөйли иде алар турында. "Менә бу хатынга нәрсә әйтәсең, мине ачтан үлә дип уйлаганмы? Берүземә алты өчпочмак тыгып җибәргән", - дип көлдерә иде. Оныгын яратты. Уллары, кызы белән дә горурланды. Аның кебек гаилә җанлы кеше булса да бик сирәктер. Холкы белән дә бик җайлы кеше ул. Аңа авыр сүз дә әйтеп булмый, челт-челт итеп күзләрен йомып алса, бар ачуың таралып бетә.
Илдар абый биш көн эшләп, ике көн ял иткән. Җомга көнне кич белән хуҗасына килеп: "Шеф, акча кайчанрак булыр икән? Хатынга бүләк аласы бар бит" - дип сораган. Тик гаиләсе өчен үлеп торган Илдар абыйга гына 8 март алдыннан хатынын сөендерергә язмаган. Яңа атнада ул ашыга-ашыга эшенә чыгып киткәндер. Тик күрәчәк күзне яздыра диләр шул.
Инил әфәнде "мәрхүмнең гаиләсенә кулдан килгәнчә булышырбыз" диде.
Нет комментариев