Артык тыйнаклык ул – кирәкме соң?

Тыйнаклык ул - иң матур сыйфат дип,
Яшь чакларда кыю булмадык.
Безне күзләп йөргән егетләрнең
Күзенә дә карый алмадык.

Тыйнакланып йөргән шул арада
Юлны кисте кыю-чаялар.
Әлегәчә бик төзәлеп бетми
Тәүге сөю салган яралар.

Тормыш - көрәш. Үз бәхете өчен
Һәркем белгәненчә көрәшә.
Бәхетнең дә зур өлешен язмыш
Кыюларга гына өләшә.

Артык тыйнаклык ул - кирәкме соң?
Күпме кыюсызлар югалган.
Өндәгән булырмын кыюлыкка,
...Үзем генә андый булалмам.