Авылымның үзенчәлекләре

Үзәктән читтәрәк урнашкан авыл клубларына, гадәттә, чын артистлар концерт белән килми дярлек. Безнең Иске Җогып авылы клубында андый концерт соңгы мәртәбә, ялгышмасам, 5 еллар чамасы элек булгандыр. Илсөя Бәдретдинова концерты иде ул. Ул үзенең төркеме белән ничек шундый кечкенә авыл клубын урап узмагандыр, белмим. Шулай да шау-гөр килеп узды ул кичне концерт. Шуннан бирле берничә клуб мөдире алышынды, аннары бөтенләй җитәкчесез калган клубыбызда Яңа ел бәйрәме дә узмады.

Инде менә тагын җанланды клуб. Әллә авыл җирлеге башлыгыбыз үзебезнең авылныкы булу үз эшен эшләдеме, әллә Яңа Шашы авылындагы мәдәният йортының авария хәлендә булуы сәбәплеме, андагы хезмәткәрләр безнең авыл клубына күченделәр. Клубны өр-яңадан җыештырып-юып чыгардылар, буядылар, төзәтәсе җирен төзәтеп, кеше кабул итәрлек "курчак өе" ясадылар. Кыскасы, клубның ишекләре яңадан ачылды. Биредә бәйрәм чаралары, концертлар, очрашулар узуы шул хакта сөйли. Өлкәннәрне җыеп, клубта бәйрәм табыны әзерләп хөрмәтләүләре үзе ни тора! "Хәзер ачлык заман түгел, Аллага шөкер, беребез дә ашар өчен килмәдек. Бергә җыелышып, очрашып, күңелле итеп сөйләшеп, аралашып утыруы үзе ни тора! Безнең күңелне күргән өчен рәхмәт яусын Зөлфия белән Гөлфинурга!" - диләр әбиләр. Шәрәфиева Галия апа очрашу мизгелләрен сөйләп бетерә алмый. Авылдан ерак китә алмаган карт-коры өчен бу очрашуның нинди бәйрәмгә әйләнүен чамалап була. Олы кешенең аздан да күңеле була, дигәннәре хактыр.

Араларында яңа гына пенсионерлар исемлеген тулыландыручы, интернет челтәрен айкаучы, Мисыр, Төркия ише илләрне әйләнеп кайтучы Фәйзуллин Фәрит абый кебек алдынгы карашлылары да бар. Ул кайда булса, шунда үзенең фотоаппараты белән күңелле очрашу мизгелләрен мәңгеләштереп бара. Истәлек өчен дип, һәрбер катнашучыга вакытында фотосурәтләрне ясап таратырга да иренми. Садыйков Раушан абый да үзенә күрә бер шәхес. Чын аксакалларча, бөтен җаваплылыкны үз өстенә алып, башлап йөрүче кеше бу тынгысыз җан. Авыл зиратын чистарту өчен өмәгә чакыру кәгазьләре язып элүдән башлап, анда катнашкан һәрбер кешегә шәхсән үзе рәхмәт белдерә, район газетасына хәбәрләр яза. Әле ул гына да түгел, авылның тарихын барлап, киләчәк өчен истәлекләр туплап ята ул. Яшьләрне генә түгел, балаларны да үз тирәсенә җыя алуы, аңа карата ышаныч һәм хөрмәтнең ни дәрәҗәдә олы булын раслый торгандыр. Шундый кешеләр үрнәгендә тәрбияләнгән яшьләр арасында эчкечелек, тәртипсезлек ише күренешләр безнең авыл өчен ят нәрсә, Аллага шөкер. Иске Җогып авылы халкы элек-электән үзенең тәрбиялелеге, тәртипле һәм укымышлы булы белән, йорт-җирләренең төзеклеге, төпле тормыш корулары белән тирә-юньдә аерылып торган. Тикмәгә генә ныклы томыш кору өчен шушы авыл егетләрен сайламаганнардыр инде Җогып киленнәре!

.