“Бәхетле балачак”та күңелле

Без килгәндә Күәм мәктәбе балалар тавышыннан шау-гөр килеп тора иде.Җәйге каникуллар башланмаган да, мәктәп тулы бала-чага, диярсең, билләһи.
Юк, мәктәп каршында эшләп килгән "Бәхетле балачак" лагерена йөрүче укучыларның шат аваз­лары икән бу. Мәш ки­леп спортзалда узган кы­зыклы уеннарда катнашып яталар. Клоун кунакка килгән икән. Түбән Көек мәктәбеннән шундый ук лагерьга йөрүче балалар да биредә. Сүз уңаеннан, Күәм авылы китапханәчесе Луи­за Вафина кунакка кил­гән укучыларны Самат Шакир музее белән дә таныштырып узган.
Лагерьга барлыгы 15ләп бала йөри. Шулар белән беррәттән 8 сый­ныфта укучы биш кыз хезмәт лагеренда шө­гыльләнә. Көн саен нинди дә булса кызыклы ча­рада катнашып, рәхәтләнеп ял итә биредә балалар. Җитәкчеләре Айсылу Гыйззәтова, вожатыйлар Резеда Сафина, Люция Ганиева, Фәрдия Төхвәтуллина, Рузилә Фа­зылҗанова, шулай ук Булат Зарипов, Фәнис Хәкимҗанов, Ислам Мул­лагалиев белән бер­лек­­тә төрле ярышларда кат­нашалар, түгәрәкләргә йөриләр. Түгәрәк ди­мәктән, Фәрдия апалары кул эшләренә өйрәтсә, Булат абыйлары белән бер­гәләп спорт чаралары оештыралар, Фәнис абый­лары белән шахматта үзләренең көчләрен сы­нап карыйлар. Казан пе­дагогия көллиятендә белем алучы, бирегә практика узарга кайт­кан Ислам абыйлары да укучылар белән күңелле чаралар оештыра. Луиза Вафина да һәрчак укучылар белән. Аның белән берлектә оештырылган "Әкиятле балачак иленә сәяхәт" исемле интерактив уен да балалар күңелендә матур хатирә булып озак сакланыр. Бөек татар шагыйре Габдулла Тукай эзләре буйлап Кушлавыч, Кырлай музей­ларына сәяхәт, төр­ле бәйгеләр, виктори­налар, экологиягә багыш­ланган фотолар күргәзмәсе ... - болар барысы да укучыларның ялын бай эчтәлекле һәм кызык­тыргыч итү өчен. Иске Казан музей тыюлыгына экскурсиягә бару да шулар эченә керә. Кул эшләре остасы Фәрдия апалары җитәкчелегендә җитештерү калдыкларыннан оештырып костюмнарга кадәр те­гәләр алар.
Лагерьда иртә 8.30да башлана, 14.30 кадәр дәвам итә. Көн дәвамын­да укучылар өч тапкыр тукланалар. Ял һәм хез­мәт лагере 21 көн дәвам итәчәк.