“Гашыйк кеше гади кеше түгел”

Мөселман бәйрәме түгел, диючеләр дә бар. Тик... бәйрәм итәбез, яшьләребез көтеп ала, хәер үзебез дә битараф түгел. Нишлисең, күңел гел җылыга тартыла, ә яратып, яратылып та яшәсәң, бу көн хисләреңне белдерү өчен бер сәбәп кенә. Райондашлар бу көн хакында ни уйлый соң, бәйрәм итәләрме?
Миңлегөл Фазлыева, Олы Әтнә авыл җирлеге башлыгы урынбасары:
- Мөнәсәбәтем уңай, ярату бар. Һәркемдә бу олы хис яши, шулай булгач аның көне дә булырга тиештер. Күбрәк яшьләр көтеп ала бу көнне, алар бәйрәм итә. Олылар арасында да бәйрәм итүчеләр бар. Билгеләп үткән кеше билгеләсен, бер начарлыгын да күрмим. Көн белән генә түгел, һәркем бэхетле булсын, яратып яшәсен.
Гөлшат Галиәхмәтова, Түбән Көек урта мәктәбе укытучысы:
- Мөнәсәбәтем уңай, тик ул кадәр зур бәйрәм дип санамыйм. Бу бәйрәмне элек мәктәптә зурлап билгеләп үтә идек, һәр сыйныф үзенчә әзерләнә иде. Соңгы еллларда билгеләп үтүне киметә барабыз. Балалар үзара "Валентинка"лар гына бирешәләр. Шәхси тормышта да мөнәсәбәтебез начар түгел, бүләкләр үк алмасак та, торт алып кайтып чәй эчкәләгән бар...
Рания Галимҗанова, китапханәләр системасы җитәкчесе:
- Мөнәсәбәтем яхшы. Зур бәйрәмнәр рәтенә кертмим. Гашыйклар өчен мәхәббәт аңлату мөмкинлеге дип тә карап буладыр, тик яратуыңны башка көннәрдә дә белдерергә була. Китапханәдә зурлап билгеләмибез, ә авыл китапханәләрендә бу көнне билгеләп, төрле кичәләр уздыралар. Өйдә дә артык зурдан кубып бәйрәм иткән юк. Бәйрәм итүчеләрне дә юңлыйм. Һәркемнең үз иреге.
- Ярату бар ул....
- Мәхәббәт нәрсә соң ул, ияләшү генә бардыр ул. Мин андый юк-барларга ышанмыйм.
- Зурлап бәйрәм итәбез, ничек инде, бер-береңне өзелеп сөй дә бу көнне билгеләмә, мин андыйларны аңламыйм....
- Мөселман бәйрәме түгел ул...

Менә шундыйрак җаваплар. Асылында - мәхәббәт. Һади Такташча әйтсәк, һәрбер йөрәк аны үзенчә яңарта. Мәхәббәткә рөхсәт сорамыйлар, мәхәббәткә рәхмәт әйтмиләр. Ул бүләк тә һәм бурыч та түгел, мәхәббәтне гаеп итмиләр - монысы Нури Арсланов сүзләре. Моннан да артык итеп әйтеп буламыни. Тик бер нәрсәне инкарь итеп булмый, мәхәббәт кешене матур итә. Матур булып, яратып, яратылып яшик. Гашыйклар көне белән Сезне!