Камаллылар Бәрәскә сәхнәсендә

Кичәгә Камал театры артистлары Илдар Хәйруллин (бабасы Бәрәскәдән), Искәндәр Хәйруллин, Радик Бариев (әтисе Өшкәтәдән), Илдус Габдрахманов, Хәлим Җәләлов, Зөлфирә Зарипова (Бәрәскәле), Ләйсән Рәхимова, Кәрим Тинчурин исемендәге театрдан авылдашыбыз Марсель Җаббаров, Татарстанның атказанган сәнгать эшлеклесе, композитор Мәсгуть Имашев кайтты.
Кичәдә Бикчәнтәевләр йолдызлыгы вәкилләре Наилә Гәрәева, Фәрит Бикчәнтәев, Люция Хәмит, Йосыф Бикчәнтәев чыгышларын авылдашлар бик җылы кабул итте. Рәфкать абый турындагы истәлекләре белән Мәсгуть Имашев, Хәлим Җәләлов, Илдар Хәйруллин, Марсель Җаббаров уртаклаштылар. Алар җанының бар җылысын театрга багышлаган остазларын олы хөрмәт белән искә алдылар.
Истәлекләр Габдулла Тукай исемендәге Әтнә дәүләт драма театры артистлары, Камал театрының үз артистлары, Бәрәскә урта мәктәбенең драмтүгәрәгенә йөрүче укучыларыбызның чыгышлары белән үрелеп алып барылды. Авылдашыбыз Зөлфирә Зарипованың җырлавы, Мәсгуть Имашевның спектакльгә язылган җырларын башкаруы, мәктәп укучысы Радик Шәрәфиевнең "Әткәй" күпере җыры күңелләрне әсир итте.
Рәфкать Бикчәнтәев катнашындагы спектакльдән, Муса Җәлилгә багышланган фильмнан экранда күрсәтелгән өзекләр аның сәхнә өчен генә яратылган талантлы шәхес булуына дәлил.
Кичәне Татарстанның атказанган сәнгать эшлеклесе райондашыбыз Луара Шакирҗан, йөрәкләргә үтеп керә торган итеп сөйләп, бик тәэсирле итеп алып барды. Кичә ахырында Рәфкать Бикчәнтәевнең сеңелесе Флера ханым, абыйсын яратып искә алып, Наилә апа, улы Фәрит һәм килене Люция, оныгы Йосыф иҗатын югары бәяләде. Кичәне хуҗалык рәисе Илгиз Хәйруллин йомгаклап, олы рәхмәтен җиткерде. Шундый мөмкинлек тудырган өчен Бәрәскә, Бәрәзә, Өшкәтә авылы тамашачылары үзеңә дә рәхмәтле, Илгиз энем.