Мәктәбем әйтә: «Кешелекле бул!»

Мәктәп, мәктәп... Ашкынып беренче сыйныфка укырга кергәндә дә, күз яшьләре белән соңгы кыңгырау чыңлавын тыңлаганда да үзенчә якын син.

Ә менә еллар узып, тор­мыш мәшәкатьләреннән бераз тынып калгач, вакыт табып, узган гомер битләрен берәм-берәм саный башлагач сине чын-чынлап сагыну хисе бәгырьне телә икән. Эх, шул көннәргә бер генә көн­гә кайтып килер, бер генә сәгать дәрестә утырып, кыңгырау чыңлага­нын тыңлар идем дип уйлыйсың. Яраткан укы­­тучыларыңның җы­лы күз карашын тоеп, акыллы киңәшләрен рә­хәтләнеп тыңлардай буласың. Тик... Аларның кү­бесе ин­де бакыйлык­ка күчкән, исәннәре шак­тый олы яшьтә икәнен, син ту­ган мәктәбем дип йөрт­кән газиз йорт­ның ин­де күптән зур үз­гә­реш­ләр кичереп, бөтен­ләй икенче булуын аң­лап, тамак төбенә төер ты­гыла. Әмма мәктәп мәк­тәп инде ул. Укыту­чылары бүтән булса да, би­насы үзгәргән булса да - барыбер якын.
Күңгәр урта мәктәбенең 50 яшьлек олы юбилей чарасына кунак булып килгән һәркем дә үзенчә әнә шулай дип уйлагандыр. 50 ел бер уй­ласаң бик күп, шул ук ва­кытта бик аз да. Билге­ле, бүгенге көндә 12 авылдан килеп укучы балаларга белем бирә тор­ган уку йортының та­рихы шушы 50 елны гы­на үз эченә алмый. Ул бик еракта калган 1832 ел­ларга барып тоташа. Шу­лай булгач, бу якларда укымышлы, затлы ха­лык яшәвен берәү дә инкарь итә алмас. Ә соңгы елларда Күңгәр мәктәбе бөтен районыбыз мәгариф өлкәсендә үзенә кү­рә бер яктылык сибүче нур булып тора. Шулай дип әйтергә тулы нигез бар, ул районда гына түгел, республикада иң ях­шылар исемлегендә. Мәк­тәпне кырык елдан ар­тык җитәкләп килгән, рес­публиканың атказанган укытучысы, бик күп мак­таулы исемнәргә лаек Наил Габидуллинны да бездә белмәгән кеше бик сирәктер. Мәгариф диң­гезендә уңлы-суллы искән давыл-җилләргә янтаймый, кәгазь упкын­нарында батмый, үзе юл ярып барган, үз кыйбла­сына тугры калган горур мәктәп-корабының штур­валын ныклы тотып барган үзенчәлекле кешеләрнең берсе ул. Укытучылары да - һәркайсы үзенә күрә бер шәхес.
- Күңгәр мәктәбенең бү­генге көндә бәйрәм итәр­гә тулы хокукы бар. Ирешкән уңышлары һәр­­кай­сыбызның күз ал­дын­да, - диде юбилей уңаеннан районыбыз баш­­­лыгы Габделәхәт Хә­­ки­­­­мов укучыларны, укы­ту­­чылар коллективын һәм килгән кунакларны бәй­рәм белән кот­лап. - Киләчәктә дә шулай ма­тур итеп, бү­тән­нәргә үр­нәк булып эш­ләргә язсын.
Район җитәкчесе укытучылар арасыннан иң-иңнәренә Мактау кәгазь­ләре дә тапшырып узды. Тәр­бия эшләре буенча директор урынбасары Гөл­наз Сабирова, укытучылар Гөлзидә Әхмәтханова, Рифат Фәйзрахманов лаек булды аларга.
Мәктәп төзелгәннән бирле берничә тапкыр ремонт кичергән. 2014 ел­да биредә капиталь ре­монт булып узды. Быел исә яңа спорт мәйданчыгы төзеләчәк дип көтелә. Бу билгеле инде республика җитәкчелегенең, һәм, иң беренче чиратта, район хакимиятенең турыдан-туры ярдәме белән башкарыла.
...Менә алар - мәктәп­тә белем бирүче 20 укытучы һәм җитәкчеләре Наил Гомәр улы - бүгенге бәйрәмнең төп сәбәпчеләре һәм башкаручылары, хезмәткәрләр бе­лән бергә сәхнә түрендә. Алар каршында бүген укучылары, авыл халкы, килгән кунаклар хөрмәт белән башын ия. Һәм алар мондый зурлауга лаек та. Чөнки һәркайсы моңа лаек, чөнки һәркайсы гади генә түгел, зур хә­рефтән Укытучы исемен йөртә.