“Шахтер”ныкы – Татарстанда иң зуры

Ел тәмамланырга әле 2 ай вакыт бар, ә "Шахтер" хуҗалыгында узган 10 ай эчендә бер сыердан 9298 килограмм сөт савып алдылар.

Узган елның шушы көнгә үк бирелгән күрсәткеченнән 2014 килограммга артык. Иң сөендергәне шул - авыл хуҗалыгы һәм азык-төлек идарәсе белгечләре сүзләренә караганда, Татарстанда иң зур сан бу! Район буенча алсак та, 10 айда һәр сыердан тәүлеклек уртача 7711 килограмм сөт савылды. Тулай савым да сокланырлык: район буенча 544987 центнер тәшкил итсә, "Шахтер"ныкы 100000 центнерга якынла­шып килә.
"Шахтер"ның соңгы ай күрсәткече дә күркәм - бер сыердан сауган сөт күләме 886 килограмм булды. Узган елгыдан 148 килограммга күп. Монда эшне яхшы оештырган җитәкче, белгечләрнең дә, тырыш савымчыларның да өлеше зур. Хуҗалык­та эшләүчегә ях­шы хезмәт хакы да түли­ләр, эш шартлары да күпләр сокланырлык. Яңа гына күрше респуб­ли­кадан Комыргуҗа авы­лына күченеп килгән са­вымчы Рузинә Гыйла­җетдинова белән шул хак­та сөйләштек.
- Бирегә килүемә куа­нам, эшкә шатланып киләм. Тиздән хуҗалык яңа йорт төзеп бете­рә һәм безнең гаиләгә тапшыра. Бу бит эшләргә стимул, - ди ул.
Аның сүзләрен савымчы Людмила Әхмәдиева да куәтли. Татарстанның атказанган терлекчесе Гөлнар Хисамиева һәм 30 ел савымчы стажы булган Рәфидә Сибгатуллина да шул ук фикердә.
Россия авыл хуҗалыгы министрлыгының опе­ратив мәгълүматларын­да иң күп тәүлеклек ту­лай савымның Татарстан­да булуы турында хәбәр ителә. Республикабыз өле­ше бөтен Россия тө­бәкләрендә сауганның 7,7 процентын ук тәшкил итә. Аерым төбәкләр бе­лән чагыштырсак, Татарстанда "ут күршеләребез": Марий Элдән - 12,5, Чуваш Республикасыннан - 8, Башкортостаннан 2,4 тапкырга артык сөт савыла. Ә Татарстанда Әтнә районы өлеше 5,2 проценттан артып китте. Әлегә көнлек тулай савымны Кукмара һәм Балтач районнарында гына бездән күбрәк алалар. Ә югарыда телгә алган 10 айлык күрсәткечләрдән күренгәнчә, "Шахтер" сы­ерлары районда 17 % тирәсе тулай савым белән куандыралар. Ме­нә шундый саннар, нә­тиҗәне үзегез ясагыз.
Автор фотосында: (сулдан уңга) Рүзинә Гыйла­җетдинова, Рәфидә Сиб­­гатуллина.