Син хатын-кыз - табигатьнең таҗы

Кояш нуры белән бер хатын-кыз
Чәчәк чикте болыт читенә...
"Салкын әле!"− димә, әй, гүзәл зат!
Синең алда кыш та чигенә...

Күрәсеңме, гөрләвекләр бүген
Тәүге җырын җырлый башлады:
Март аеның нечкә билле җиле
Нәкъ Такташча, карны ашады...

Калкан итеп хатын-кызлар көнен
Яз башына куйган кемнәрдер.
Суыкларга каршы торсын, дигән,
Җылы алып килсен, дигәндер.

Күз нурыңнан карлар − челтәр-челтәр,
Күңел җылың язны уята...
Син − хатын-кыз − табигатьнең таҗы,
Ачылмаган синдә сер ята:

Кирәк чакта корыч ныклыгы бар,
Өрфиядәй юка җаныңда.
Син сөярлек,
сине сөярлек зат
Булса иде һәрчак яныңда!..