“Әтнә таңы“ - медиклар бер айлык сабый тормышы өчен көрәшәләр

Нәни кыз февраль аенда авыр хәлле гаиләдә дөньяга килгән. Аның әнисенә бала табарга күршеләре ярдәм иткән. Алар сөйләвенчә бала туганда зәп-зәңгәр булган һәм суламаган. Күрше хатыны аның аркасына каккалагач һәм авыз борынын лайладан чистарткач кына сулап җибәргән. Шул ук күршеләр сүзе буенча, әни кеше бала тапканда исерек булган. Бала тууга әлеге гаиләне авыр хәлле буларак исәпкә бастырсалар да, баланы шунда ук алып китүче булмаган. Бер айдан күршеләре сабыйның туктамый елавына игътибар иткәннәр. Әнисе аны бөтенләй дә ашатмаган, шуңа да бала бик хәлсезләнгән. Хәзерге вакытта әлеге баланың язмышы өчен врачлар бар көчен куя.