Тормыш атлы ормыш

Кемдер кинәт кенә килеп кереп,
Бәхетле итәр, дип көтмәдем.
Булганына шөкер итә белдем.
Бик артыгын өмет итмәдем.

Үкенерлек яшәмимен кебек.
Тайпылмадым кебек хак юлдан.
Түмгәктән мин тау үстерә алдым
Әнкәй-әткәй биргән акылдан.

Ялгышларым, хаталарым булды -
Кешеләргә артык ышандым.
Канатларым сынды. Күтәрелдем.
Тагын зәңгәр күккә очалдым.

Тормыш дулкынында йөзә-йөзә
Бер калыктым да мин, бер төштем.
Батмас өчен ишкәгем сынганда
Сыңар кулым белән мин иштем.

Язмыш түгел, тормыш изә безне.
Җәбер күрмәдем мин язмыштан.
Язмышымнан сорыйм, яклый күрче
Тормыш атлы шушы ормыштан?!