Кабат чүп-чар турында

Чөнки чүп-чарның “баш күтәргән” вакытлары бу. Чынлап торып уйласак, җәен һәм кышын ук “борын төртә” алар. Ә гаеплеләре – без, үзебез үк.

Артыбыздан җыештырып кую юк инде ул, печенье, кәнфит кәгазьләрен, пыяла, плас­тик шешәләрне чүп савытына илтү ирендерә – аулаграк урынга ташлап калдырабыз. Әнә шулай син, ул, теге ыргытканнар барысы бергә җыелып, хәйран ук зур чүп-чар күче хасил итәләр.

Олы Әтнә авыл җирлеге башкарма комитеты җитәкчесе Сергей Порфирьев белән шул хакта сөйләштек.

– Контейнерга бары каты-көнкүреш калдыкларын гына чыгару тиешле. Моңа бары өйдән чыккан чүп-чар гына керә, ә чәчәк, үлән, бәрәңге сабаклары, шулай ук төзелештән калган, әйтик, кирпеч, фанера, гипсокартон калдыклары каты-көнкүреш калдыгы саналмый, – диде ул.

Шуны күз алдында тотып, тиздән чүп-чар чыгару мәйданчыкларына яшерен видеокамералар урнаштырыла. Чүп-чар чыгару кагыйдәләрен бозып тотылучыларга карата административ протоколлар төзелә һәм әлеге кыңгыр эш район комиссиясе тарафыннан карала – штрафы 3,5 мең сумга кадәр булачак. Шул исәптән башка авыллардан килеп, чүпне машинадан гына ыргытып китүчеләр дә ачыкланачак.

– Бу Законлы нигездә башкарыла. Законны бозучылар, һичшиксез, җавапка тартылачаклар, – дип ассызыклады җитәкче.

Чыннан да, быел һава торышы дым, яңгырлы, шуңа күрә ботак калдыкларын – ягарга, тиздән чүп-чар контейнеры белән янәшәдә тау күче итеп өеләчәк бәрәңге сапларыннан бер дигән тирес компосты ясарга була. Табигатькә һәм матурлыкка үзебез үк төкермик инде, җәмәгать!