“Ленин” һәм “Фәйзи Галиев” саннары

Икесен бер мәкаләдә язуның сәбәбе – аларны чагыштырырга теләүдә түгел, кире­сенчә, яңалыкка, алгарышка омтылып көн күрүләрен ассызык­лау.
Башта Ленин исемендәге җитештерүче авыл хуҗалыгы кооперативы нәселле заводы икътисадын чагылдырыйк. “Ленин” җитәкчесе Илгиз Хәйруллин җыелышны күтәренке рух белән алып барды. Чөнки күмәк хуҗалыкның икътисади саннары куанырлык. Әйтик, төп күрсәткеч саналган рентабельлек дәрәҗәсе 25,7 %, сатудан кергән табыш – 165 млн. 074 мең сум тәшкил итә. Ә дәүләттән кергән ярдәм белән ул 39,6 %, саф табыш 255 млн. сумлык булган.
2024 елны би­редә агымдагы бәяләр белән 936 млн. 576 мең сумлык тулай продукция җи­тештерелде, ә бу алдагы елгыдан 36 процентка артык. 
Монда күпчелек өлешне сөт сатудан кергән – 628 млн. 227 мең сум акча алып тора. Хәер, монысына артык гаҗәпләнергә кирәкми дә. Хәзер авыл хуҗалыгында рентабельлелеге югарырак булган сөтчелек кенә калып бара бугай инде. Район башлыгы Габделәхәт Хәкимов әйткәнчә, ашлыкны да терлек авызы аша үткәрү отышлырак. Чөнки терлекчелек продукциясе тагын да артачак кына.
Иң куанычлысы – “Ленин”ның хезмәт хакы фонды 20,6 процентка артып, 152 млн. 889 мең сум тәшкил итте. Нәтиҗәдә хезмәт хакы бер колхозчыга карата уртача 62 мең 455 сумга җитте. Шулай да биредә бер санга игътибар итү кирәк. Моны күмәк хуҗалык җитәкчесе Илгиз Хәйруллин үзе ассызыклады. Бу – хезмәт хакы фондының сатудан кергән керемнең 18,9 процент тәшкил итүе...
Ничек кенә сәер тоелмасын, Фәйзи Галиев исемендәге күмәк хуҗалыкта да ул шул чама тәшкил итә – биредә ул 18,7 %. Дөрес, монда хезмәт хакы азрак – бер колхозчыга уртача 45695 сум. Уртача район күрсәткеченнән кимрәк, әлбәттә. Әмма агымдагы елда аны уртача район күрсәткеченә җиткерергә планлаштыралар.
Күңгәр мәдәният йортында узган җыелышта төп док­лад белән Фәйзи Галиев исемендәге күмәк хуҗалык җитәкчесе Илнур Хәкимҗанов чыгыш ясады. Ирешелгән уңышларны да, кимчелекләрне дә яшермичә ясалган ачык чыгыш булды ул.
2024 елда күмәк хуҗалыкта 68209 центнер сөт җитеш­те­релеп, 64604 центнеры сатылды. 1 центнер сөтнең үзкыйммәте 25 сум 34 тиен булды, сатылган сөтнең уртача бәясе 37 сум 74 тиенне тәшкил итте. Бик күңелле хәл – сату бәясе алдагы елгыдан 48 процентка артыграк. Ә гомумән алсак, узган елны авыл хуҗалыгы продукциясе сатудан күмәк хуҗалыкка 289 млн. 655 мең сум акча кергән. 
Кыскасы, алдагы көнгә карап эш итәләр. Агымдагы елны яхшы нәтиҗәләр белән тәмам­лап, киләсе отчет-хисап җыелышында бу күмәк хуҗалыклар өчен куанырбыз дигән өметтә калыйк.
Биредә тагын бер мөһим мәгъ­лүматны һич кенә дә язмыйча калып булмый. 
“Ленин”да элек­­­ке елларда аз хезмәт хакына эш­ләп хәзер дә аз пен­­сия алучылар­га ай саен 2000 сум кү­ләмендә өс­тә­мә бирергә карар кыл­­дылар. Бәра­каллаһ! Искиткеч бит бу!
Тагын бер күрсәткеч, дө­ресрәге, “Ленин”ның икътисадын һәм мөкинлеген күзаллаган хәлдә һичшиксез ирешеләчәк үр – агымдагы елда бу күмәк ху­җалык тулай продукция алу күләмен 1 млрд. сумнан да арттырырга ниятли.
Бу ике күмәк хуҗалык өчен күңел тыныч – шөкер, алар ниятләгәнне башкарырлар.