Күәмнәр хоккей уйнады
22 февральдә, Күәм авылында, авылдашлары – Чернобыль АЭСы һәлакәте корбаны Реваль Низамов һәм авылның хоккей спортын үстерүгә зур өлеш керткән һимаяче Рөстәм Хәбибуллин истәлегенә хоккей ярышлары узды.
Ярышның төп оештыручылары – Рәдиф Сабитов , авыл яшьләре, Күәм мәктәбенең физкультура укытучысы Булат абый Зарипов.
Күәм авылыннан 4 хоккей командасы оештырылган. Беренче класс укучысыннан башлап, чәчләренә чал йөгергән агайларга кадәр бар.
«Дүрт командадагы уенчыларның һәркайсы минем укучыларым»,- дип горурлана Булат абый. Горурланырлык та шул.
Хоккей уенын карарга килгән җанатарлар – Кышкы сабантуй хәтерләтә. Халык шулкадәр күп.
Килгән кунакларга, җанатарларга ике зур казан асып плов, күп итеп шашлык пешерделәр. Барысы да телеңне йотарлык тәмле, бөтен нәрсә уйланылган, чәе, каһвәсе, плов-шашлыклары – барысы да иганәчеләр тарафыннан бушка. Авыл халкы аларга олы хөрмәтен, зур рәхмәтен җиткерә.
Шундый зур бәйрәм оештыручыларга савап булып, Рөстәм һәм Реваль абыйларның рухларына дога булып ирешсен иде.
Следите за самым важным и интересным в Telegram-каналеТатмедиа
Нет комментариев