Әтнә район суды 48 яшьлек Эрнст Хөсәеновка карата хөкем карары чыгарды.
Ул хакимият вәкилен ачыктан-ачык мыскыл итүдә һәм полиция хезмәткәренә карата көч куллануда гаепле дип табылды (РФ Җинаять кодексының 319 маддәсе һәм 318 маддәсенең 1 өлеше). 2026 елның 27 февралендә Хөсәенов исерек хәлдә полиция хезмәткәрләре тарафыннан район хастаханәсенең кабул итү бүлмәсенә китерелә.
Анда ул җәнҗал куптара, медперсонал барында цензурасыз рәвештә участок инспекторын мыскыл итә, ә аннары аның аякларына ике тапкыр тибә. Суд бу очракта гаепне киметә торган хәлләрне – гаепне тануны, үкенүне, гаепләнүченең әнисенең һәм абыйсының инвалидлыгын исәпкә алды.
Әмма җинаятьләрнең рецидивы һәм аны исерек хәлдә кылу авырайта торган шартлар дип танылды. Хөсәеновка 1 ел 7 айлык сынау срогы белән, шартлы рәвештә 1 ел да 7 айга ирегеннән мәхрүм итү рәвешендәге җәза билгеләнде.
Моннан тыш, суд аны наркоманиядән дәвалану узарга һәм даими рәвештә җинаять-үтәү инспекциясенә теркәлүгә килергә мәҗбүр итте. Хөкем карары законлы көченә кермәде әле һәм аңа дәгъва белдерергә мөмкин.
Нет комментариев