Туксан еллык бәхетле гомер

Шушы көннәрдә Сәвия Галиевага 90 яшь тулды. Аны олы юбилее белән Күәм авыл җирлеге башлыгы Искәндәр Хәсбиуллин һәм җир­ле ветераннар советы җитәкчесе Рүзәл Абдуллин котладылар. 
Туган көне белән котлап, бүләкләр тапшыргач, юбиляр уңайсызланып:
– Миңа бүләк кирәкми, игъ­тибарыгыз өчен рәхмәт, – дияргә ашыкты.
Ветераннар советы җитәкчесе тагын бер төр оригиналь бүләк әзерләгән – тәбрикләү сүзләрен шигъри юллар аша җиткерде. “Авылда бик хөрмәтле пар бу. Тагын да куанып, саулык-сәламәтлектә, бик озын гомерле булып яшәргә язсын аларга”, – дип теләде.
Сәвия Галиева авыр, әмма, шак­тый данлы гомер юлы уза. Бу очракта аның хезмәт юлын күз алдында тоту урынлы.
– Олы Әтнә авылында туып-үстем. Мин бала вакытта ук әтием сугыштан яраланып кайтты, шул сәбәпледерме, әллә ни озак яши дә алмады. 1953 елны вафат булды. Абыем Мансур, мин һәм сеңлем әниебез белән бергә яшәдек, – дип искә ала ул.
Мәктәпне тәмамлагач, укы­тучы булу теләге белән Казан педагогик училищесына юл тота. Анда укып кайткач, Комыр­гуҗа мәктәбендә, соңрак Мәрҗәндә эшли. Моннан соң аны олы Бәрәзәдәге балалар бакчасы мөдире булырга кодалыйлар. “Җаваплы хез­мәт булгачмы, курыктым. Нә­ти­­җәдә, райпода салымнар буенча хисапчы булып урнаша.  Язмыш җиле уңнан да исә, сулга да этәрә бит ул. Ул арада Әтнә райком секретаре ярдәмчесе булырга чакыралар. Бераз эшләгәч, укытучы итеп Бәрәскә мәктәбенә җибәрәләр. Янә язмыш кушуымы, чыгышы белән Бәрәскәнеке булган, Күәм мәктәбендә эшләүче укытучы кыз мәгариф мө­дире аркылы аның белән үзара  мәктәпләрне алыш­тыруларын сорый. Каршы кил­ми Сәвия Галиева. Шулай итеп Күәм мәктәбендә укыта башлый. Бу вакытта аны яңа гына Үзбәкстан якларында йөреп кайткан Тәлгать исемле егеткә димлиләр. Өлкән яшьтәге каенана, йорт тулы мал-туар булган йортка килен булып төшә ул. Чит якларда акча эшләп кайткан Тәлгать йорт-җирне дә башка урынга күчереп, яңартырга вәгъдә бирә. 
Ике ел чамасы укытучы булып эш­ләп, олы кызы тугач, эшен алышты­рыр­га була. Сорап йөри торгач, аны Күәм балалар бак­часына мөдир итәр­­гә телиләр. Тик ул үзе каршы бу­ла, нәтиҗәдә аны тәрбияче итеп кү­че­рәләр.
Балалар бакчасы мөдире читкә күчеп киткәч, кабат җи­тәкче вазифасын башкарырга өндиләр. Ике тапкыр мө­дир­леккә боерык та алып кай­тып кулына тот­тыра­лар хәтта.
– Язмыштырмы, ял­гыш­­тыр­мы, мин кабат риза­лаш­мадым, – ди ул.
Түбәсеннән су үткән, балалар йоклатырга урыны җитмәгән, кайберсен өстәлгә салырга мәҗбүр булган җиргә җитәкче булып килергә кыймый. Читтән килгән керәшен кызы бер ел эшләгәч, ачкычны фатир хуҗасына калдырып, китеп бара. Моннан соң инде, авыл советы рәисе һәм күмәк хуҗалык җитәкчесе соравы буенча, мө­дирлеккә ризалашырга туры килә. Шул килүдән 10 елдан артык Күәм балалар бакчасы мөдире булып эшли. Бер ел чамасы яңа балалар бакчасын җитәкләгәч, пенсиягә китә.
Бар язмышы диярлек шушы һөнәр белән бәйле аның.  Хәер, ул гына да түгел, җәмәгать эшләрен дә еш башкара. “Кү­әмгә килгәннән бирле сайлау комиссиясе секретаре булып эш­ләдем. Соңыннан “Беларусь” тракторы белән протоколларын ил­теп йөрдек. Ә берсендә, һич оныта алмыйм, иртән ки­теп, ба­ры көтү каршы алган ва­кыт­та гына кайттым. Әлбәттә, өй­дәгеләр бик риза булмады. Ә кае­нанам Маһибәдәр: “Ай-яй, кай­сы каланы алып кайтып ки­лүең?” дип каршы алды”, – дип көрсенә. Каенатасы Гариф бе­лән очрашырга насыйп бул­мый. Бөек Ватан сугышына бе­ренчеләрдән булып китеп, анда хә­бәрсез югала. Аңарчы яманаты чык­кан Суслангерда була, Маһи­бәдәр апа аның янына өч тапкыр бара. Соңыннан кайнанасын тәрбияләп соңгы юлга озата. Яшь вакытта торган фатир хуҗасын да  бер елны өенә алып кай­тып, ә барысы 14 ел тәрбияли.
Хезмәтенә күрә дәрәҗәсе зур була Сәвия апаның – монысын күпсанлы Мактау грамоталары дәлилли. Аларны әле дә күз карасыдай саклый. Чөнки гаять гадел, һәр эшне җиренә җиткереп башкарган җитәкчене ихлас хөрмәт итәләр.
Тагын бер кызыклы факт – Сәвия һәм Тәлгать Галиев­лар­ның бәхетле гаилә кору­ларына 56 ел булган. “Үзбәк­стан­да тормыш рәхәт иде. Әм­ма бирегә кайтуыма тамчы да үкенмим”, – дип канәгать елмая гаилә башлыгы да. Шулай бул­мый ни, бүгенге көндә ике кыз – Гөлнара һәм Клараның, 3 онык һәм 2 оныкчыкның ка­дерлеләре алар.