Йөрәкләрдә - җөйле камчы эзе...

Бүтән идек
Без бит элек бүтән идек кебек...
Май күгеннән йолдыз санаганда,
Тузганакка өргән чакта чынлап,
Уйнап җил йотканда таганнарда...

Без бит элек бүтән кебек идек...
Күзләр бүтән иде... сүзләр бүтән...
Йөрәкләрдә - җөйле камчы эзе -
Ә мин май күгеннән йолдыз көтәм.

Бүтән инде тавыш... Сагышлар да! -
Мең кат төреп, түргә яшерелгән.
Сискәнүең тоям чакрым аша
Төшләреңдә минем дәшүемнән.

Без бит элек бүтән идек! Идек... -
Әрнүләрнең кайтавазы әллә?
Аерым-аерым җиргә сөрелгәнбез
Май күгеннән йолдыз яуган мәлдә.
25.05.2019
Гөлүсә Батталова
#шигырь
#гөлүсәбатталова

С. Мингатина фотосы