Әтнә район халкы айныган

Территориаль органның җитәкчесе Булат Кадыров, бүлек җитәкчесе Ләйсән Абдуллина үз эшчәнлекләре белән таныштырдылар.
- Биредә штат бетерелү сәбәпле, аена бер тапкыр Әтнә районының бер авыл җирлегенә килүне, халык, укучылар белән очрашуны гадәткә керттек, - ди территориаль орган җитәкчесе.
Хәер, алай дию дөрес тә булмас. Бу очракта махсус очрашып сөйләшү өчен киләләр. Ә болай, төрле тикшерүләр белән еш киләләр: социаль яктан мөһим саналган товарларга мониторинг уздыралар. Моңа, 9 исемдәге товар керә: өчесе икмәк-булка һәм алтысы сөт ризыклары. Ә беләсезме, икмәк-булка ризыкларына "наценка" - 15 проценттан һәм сөт ашамлыкларына 12 проценттан артырга тиеш түгел икән бит!
Күңгәр авыл җирлегендә төрле сораулар белән килүчеләр күп булган. Гөнаһына керер хәлем юк, анысын үзем күрмәдем. Ә белгечләр исә, берәүнең, хәтта, күгәрә башлаган каймакка шикаять белән килүен әйттеләр. "Мөгаен, бушатканда бәрелеп тишелгәндер. Һава кереп бозылган, күрәсең. Аны алыштырп бирергә тиешләр", - дип нәтиҗә дә ясадылар. Территориаль органның белгеч-эксперты Алсу Вәлиева да килгән. Ул Күңгәр мәктәбенә класстан тыш чарага - укучы балалар белән очрашуга киткән. "Мәктәпләрдә еш булабыз. Укучыларга кулланучылар хокукларын яклау буенча аңлатулар алып барабыз", - диделәр.
- Гомумән алсак, районда бу өлкәдә иң нык кызыксынучылар һәм сораулар бирүчеләр Олы Мәңгәр авыл җирлегендә булды, - дип саныйлар.
"Аракыны тыю турында да сөйләүчеләр бар. Сез ничек уйлыйсыз?" - дип кызыксындым.
- Гади халык күзлегеннән карасак, без бу идеягә бик уңай карыйбыз. Әмма "Госалкогольинспекция" структурасында эшләүчеләр буларак, аракы сәүдәсенең дә бюджетны тутыруын аңларга кирәк. Ә бит Әтнә районында, дөрестән дә, алдагы ел белән чагыштырсак, алкоголь куллану сизелерлек дәрәҗәдә - 25 процентка кимеде. Ә Татарстанда җитештерелгән аракыны куллану 28 процентка ук аз, - ди Булат Кадыров.
Бер уңайдан җан башына алкоголь куллану күрсәткече белән кызыксындым. Бездә - 9 литр. Республикада бу сан күбрәк икән. "Шәп бит инде, мәкаләгә баш исем дә табылды. Димәк, айныйбыз!" - дим.
Тагын бер күрсәткеч, монысы бик уңай күренеш - суррогат алкоголь куллану очраклары теркәлмәгән. Аның каравы, 2 тапкыр "идән астыннан сатканда" тотылганнар. Һәрберсенә 3500 сум штраф чәпегәннәр. "Әтнә районында алкогольне сату вакытын чикләү буенча да закон бозулар теркәлде. Моннан соң бу өлкә аеруча катгый контрольдә булачак", - диделәр.
Территориаль органның үз юристы да бар. Теләүчеләр һич курыкмагыз, аның белән дә, башкалары белән дә аралашу бушлай, диделәр. Әгәр инде сатучылар "бөгәргә" тырыша дип шикләнсәгез, һич шикләнмичә Арчага 3-28-93 телефоны белән шалтыратыгыз.