Бәрәскә авылы китапханәсендә матур әдәбият әсәрләрен яратып укучы, аларга "гашыйк" өлкәннәр түгәрәк өстәл артына җыелды. Китапханәче Айсылу Җамалиева очрашуны башлап җибәреп, китапның кеше тормышында әһәмиятенә, китап укуның зарурлыгына тукталды. Татар китабының тарихы турында сөйләде. Китап ул гыйлем һәм рухи байлык чыганагы. Моның шулай икәнлеген өлкәннәребез кабат раслады. "Мәктәптә уку елларында...
Бәрәскә авылы китапханәсендә матур әдәбият әсәрләрен яратып укучы, аларга "гашыйк" өлкәннәр түгәрәк өстәл артына җыелды.
Китапханәче Айсылу Җамалиева очрашуны башлап җибәреп, китапның кеше тормышында әһәмиятенә, китап укуның зарурлыгына тукталды. Татар китабының тарихы турында сөйләде.
Китап ул гыйлем һәм рухи байлык чыганагы. Моның шулай икәнлеген өлкәннәребез кабат раслады. "Мәктәптә уку елларында ук бездә чын китап укуга карата кызыксыну уянды, без шуннан аерылмыйбыз, кулга китап тотып, аны "тәмләп" укуга ни җитә", - диделәр алар китапның электрон вариантын укуга үз фикерләрен белдереп.
Өлкәннәр язучылардан Мөхәммәт Мәһдиев, Мәдинә Маликова, Нәбирә Гыймадетдинова, Зифа Кадыйрова, Гөлчәчәк Галиева, Гөлсинә Галимуллина китапларын яратып укыйлар икән. Шулай ук һәр язучының иҗатына карата фикерләрен дә белдерделәр. "Әйбәт китап булса, телевизор карау да, ашау да онытыла, укыр өчен вакыты да табыла", - диләр алар. Мәктәптә озак еллар укытучы булып эшләгән Асия апа Садыйкова ,мәсәлән, хәзер дини китапларга өстенлек бирүен, Мөхәммәт пәйгамбәр турында китапны мәчеткә йөри башлаганчы ук укуын әйтте. Ире Габдуллаҗан абыйга да "китап җене" кагылган. Казаннан да алдыртып, үзләре кебек үк Галиевләр гаиләсе белән дә китап алмашып укыйлар. Гадәттә, тормыш турында, мәхәббәт турында китаплар укырга яраталар. Айсылу Төхбиевага китаптагы табигать күренешләре сүрәтләнгән урыннар ошый. Габдуллаҗан Садыйков, Рәис Гәләвиев исә төнлә дә китап укыйлар икән. Ә Илдус Шәмсиев мәктәптә укыган чорда юрган астында фонарь яндырып китап укыганнарын да искә алды. "Кызык җирен тагын бер укыйм әле, дип, китапны яңабаштан укып чыккан вакытлар да була", - ди Тәнзилә Гәләвиева. Шунда ук китапханәче Айсылу Җамалиеваның китапханә өчен үз акчасына да китаплар алып кайтуын әйтеп киттеләр. Китап турында фикер алышу чәй өстәле артында барды. Өлкәннәр шулай ук балаларының да китап укып үсүе турында әйттеләр. Ә менә оныкларының китап укырга бик теләмәүләренә борчу белдерделәр.
