Әтнә таңы

Әтнә районының Комыргуҗа авылында яңа балалар бакчасы ишекләрен ачты

Комыргуҗа мәктәбе базасында балалар бакчасы ачылды.

Бу уңайдан мәктәпнең спорт залында тантаналы чара оештырганнар. Мәктәп көче белән бик матур концерт әзерләгәннәр. Җыелган авыл халкы, әти-әниләр, кунаклар залга кергән бакчаның булачак хуҗалары - нәни балаларны кул чабып каршыладылар. Нәниләр белән аралашырга да өлгердем. 5 яшьлек Камил бакчаны карап чыгарга да өлгергән. Йөзенә горурлык хисе чыгарып: "Бик ошады", - ди. Янә бер кечкенә кыз бала: "Бакчага үзем теләп йөрим. Анда бик матур", - диде. Дөрестән дә, сокланырлык, яңа кайтарылган җиһазларга исең китәрлек! Ә матур бүлмәләре, җылы идәне һәм бакчаның яктылыгы хакында төзелеш барышында ук язган идек.

- Әлеге бакча Татарстанда гамәлдә булган күп программаларның берсе нигезендә төзелде. Төзүче егетләр бик тырыштылар. Бакчагыз бик матур булды, тик мәктәбегез генә искереп бара. Киләчәктә анысын да ремонтларбыз, ышанып торыгыз. Өметсез шайтан гына... - диде район башкарма комитеты җитәкчесе Фәрит Нуриев ачылыш тантанасында.

Мәгариф бүлеге җитәкчесе Гөлшат Закирова да авыл халкын бәйрәм белән котлады:

- Бакча ачылу авыл өчен зур тантана. Бу бакча озын гомерле булсын иде, - дигән теләк белдерде.

Реклама

"Шахтер" хуҗалыгы җитәкчесе Әнәс Хәкимов та бәйрәм белән котлады. Бер уңайдан сабыйларга изге теләкләрен җиткерде. Ата-аналар исеменнән чыгыш ясаган Гөлсинә Мөхәммәтҗанова да бакча ачылуның ата-анага гына түгел, ә мәктәпкә дә файда китерәсен ассызыклады.

- Депутатлыкка кандидатлар белән очрашканда халыкның әллә ни гозере булмады. Чөнки, капкадан чыгуга - асфальт юл... Бердәнбер борчуыбыз шушы бакча иде, - диде.

Мәктәп директоры Гөлбану Шәрәфиева бакча персоналы белән таныштырды. Бакчаны мөдир Фәридә Шаһиева җитәкли, Алинә Әхтәмова тәрбияче вазифаларын башкара, пешекче - Раилә Сабирова.

Зур куаныч, бакча ишеген Комыргуҗаның 20 баласы ачып керәчәк.

Иң мөһим һәм кызыклы язмаларны Татмедиа Telegram-каналында укыгыз


Теги: яшәеш
Нравится
Поделиться:
Реклама
Комментарии (0)
Осталось символов: