Әтнә юлларында машиналар белән куышлы уйнадык

Реклама

- Андыйларны ачыклау җәһәтеннән пресс-рейд уздыру өчен иң уңайлысы - ял көннәре, - диде "Әтнә" полиция бүлекчәсенең ЮХИДИ инспекторы Фәнил Муллагалиев.
Шулай итеп шимбә көнне юлга чыктык. Ничек кенә көлке тоелмасын - максатыбыз изге. Чынлыкта, техника руле артына менеп кунаклаган исерекне дә, тирә-яктагыларны да, булырга мөмкин куркыныч хәлдән аралап калырга тырышабыз!
Көн дәвамында ремень такмаган, техник яктан төзек булмаган транспорт белән идарә иткән һәм вак хокук бозулар өчен җавапка тартылучылар булды. Берәү әнә элекке штрафын вакытында түләмәгән. Хәзер кесәсеннән икеләтә чыга яки 15 тәүлеккә арест салалар.
- Кичә көндезге 11.00дә Олы Әтнәдә "ВАЗ-2115" машинасын йөртүчегә административ протокол төзедем, - ди инспектор.
Йөртүче "Дару эчтем", дип акланган. Тик больницага тикшеренергә барудан баш тарткан. Нәтиҗәдә, аңа каршы Россия Федерациясе административ хокук бозулар турындагы кодексның12.26нчы маддәсе, I өлеше буенча протокол төзелгән. Безнеңчәгә тәрҗемә итсәк, алкотестор аркылы да, больницада тикшеренүдән дә баш тарткан. Ул 1,5-2 елгача техника йөртү хокукыннан мәхрүм ителергә мөмкин. Өстәвенә, 30 мең сум штраф түләячәк, ә машинасы "штраф-стоянка"га куелган. Анысының да һәр тәүлеге өчен 1500 сум түләргә кирәк булачак.
- Мистика, - дип куйды инспектор, чираттагы исерек машина йөртүчене кабат 11.00дә туктаткач.
Тик бу юлы "Урал" машинасын төнлә һәм бераз гына куышлы уйнаганнан соң туктатты. Йөк машинасы Арча районының Кенәр авылыннан Мари республикасына кайта иде. Кызыл Утар белән Кышлау арасындагы юлда ЮХИДИ машинасын очраткач, каушап калдымы шунда, бер чыкрым тирәсе туктый алмады! Чынлыкта, туктарга уйламады да. Ә бәлки, инспектор әйтмешли, күзе тонгандыр - ЮХИДИ машинасын күрмәгәндер. Артыннан куганда инспектор репродуктор аркылы татарча да, русча да... хәтта марича да кычкырды бугай. Миңа шулай тоелды. Курыкмыйча авыз тутырып әйтә алам - мин дә булыштым. Инспекторга комачауламыйча, ныклап тотынып бардым... Мескен шоферга башта кодексның 12.25 маддәсенең II өлеше буенча җавап бирергә туры киләчәк. Ул "За неподчинение" дип атала. Больницада да булдык. Шофер шул ук кодекстагы 12.8 маддәнең I өлеше буенча да җавап тотачак. "Урал" шоферы да 1,5-2 елга машина йөртү хокукыннан мәхрүм ителә һәм 30 мең сум штраф түли. Моннан тыш, машинасы "штраф-стоянка"га куелды.