Әтнәләрдән өйрәнәләр

Реклама

Нәтиҗәсе күренә. Сишәмбе көнне район башлыклары җитәкчелегендә алты район делегациясе килде. Район башлыгы Габделәхәт Хәкимов та:
- Барлык районнарны бергә кабул итеп булмый. Бу - өченче төркем, аларны "Таң" хуҗалыгы базасында кабул итәбез, - диде.
Терлекчелек - Әтнәнең визит картасы. Бу өлкәдәге уңышлар, яңалыклар белән һәрдаим таныштырып барабыз. Безнең терлекчелек белән кунаклар да яхшы хәбәрдар. Кызыксынучылар да күп. "Таң"ның яңа тораклары белән танышып йөргәндә: "Кара, ничек эшләгәннәр"... "Тәрбия ысулы уңайракка охшаган"... "Салам өстендә яткан терлек туңмый инде ул", - дип сокланулар ишетелде. Кунакларның конкрет фикерләрен дә тыңладым. Актаныш районы башлыгы Фаил Камаевтан алардагы тәрбия ысуллары хакында сораштым. Ә ул:
- Терлек тәрбияләүдә төрле ысуллар кулланабыз. Сездәге тәрбия ысулы игътибарга лаек, - дип билгеләде.
Ак Барс-Буаның 2 филиал директоры Әлфак Нигъмәтуллин фикере үзенчәлекле яңгырады.
- Бозаулар тәрбияләү ысулы аеруча ошады, - диде.
3 көн эчендә яңа дөньяга килгән бозауларны бергә туплап, 7-10 көн буе бокста тотып, аннан соң гына күчерү ысулын якын күргән ул. Моны үзебезнең "Таң" хуҗалыгы җитәкчесе Алмаз Сибагатуллин да телгә алды.
- Күбрәк профилактикага игътибар итәбез. Бездә бозау сакланышы да югары - 96 процент, - диде.
Продукцияне мул җитештерүдә терлекне бәйләмичә тәрбияләү мөһим роль уйный. Буа районының баш зоотехнигы Рәшит Фәйзрахманов әнә шул фикердә.
- Безгә дә күчәргә кирәк, - ди.
Тукай районының "Ярыш ҖАХ" җаваплылыгы чикләнгән җәмгыяте җитәкчесе Рәсим Шәйхәттәров:
- Барысы да кеше факторына бәйле, - дип саный. Ә соңыннан:
- Монда барысы да заманча, фән кушканча... Терлекне яхшы итеп тәрбияләр өчен уңайлы микроклимат кирәк шул, - дип өсти.
Газетада гел язабыз, районның авыл хуҗалыгы идарәсе җитәкчесе Хәмит Галимҗанов та һәрвакыт диярлек:
- Бу ысул белән тәрбияләгәндә, микроклимат бик уңайлы була, - дип ассызыклый.
Семинарга әйләнеп кайтсак, минемчә, кунаклар бик мөһим мәгълүматлар алып киттеләр.