Яңа ел диюгә, күз алдыбызга бүлмә түрендә басып торучы чыршы, аны бизәгән гирляндалар, шул утлар астында ялык-йолык килүче мишура, хуш исле мандариннар, шәмпан шәрабе, бәйрәм көнендә телефонга берөзлексез килеп торган sms-хәбәрләр һәм шуның ише бик күп-бик күп әйбер күз алдына килеп баса.
Ә бар иде бит заманалар, бәйрәм якынлашты исә, котлау открыткалары сайлый башлый идек, кич утырып аларны туганнарга (һәрберсенә аерым теләк белән!) яза идек... Ә иң кызыгы, мөгаен, декабрь ахырыннан башлап гыйнвар урталарына кадәр үзеңә килгән открыткалар булгандыр. Почта тартмасын ачып җибәрүгә, кулыңа 3-4 открытка коелып төшә. Рәсемнәренә генә күз төшер әле: Кыш бабай һәм Кар кызы, 12гә якынлашкан сәгать уклары, тау шуучы бала-чага, урман аланында бәйрәм оештырып йөргән тиен, аю, куянннар... Әйе, безгә, совет чоры балаларына, әкият дөньясына алып кереп китүче, өлкәннәрнең дә күңелен әсир итүче шундый Яңа ел открыткалары белән бер-беребезне тәбрикләргә насыйп булды.
Беренче карашка, бүген замана баласын берни белән дә шаккатырып булмый кебек: үзе сөйләшә торган курчак, пульт белән идарә итеп йөртелә торган машина, тимер юлдан чабучы поезд - болар бакча баласының Кыш бабайдан сорый торган бүләкләрнең бик азы гына әле. Ә инде Кыш бабайга ышанмаса да, әти-әнидән Яңа елга бүләк көткән урта һәм өлкән сыйныф укучысының "запрослар"ы шаккатырлык. Кая инде аларга Яңа ел открыткалары язып утыру да үзләренә килгәннәренә сөенә белү! Шулай да эксперимент эшләп карыйсы иде.
"ХХнче гасырдан сәлам" - сыйныфыбызда оештырылган күргәзмәне без әнә шулай атадык, ә открыткаларны укучылар һәм укытучылар белән бергәләп җыйдык. Өлкәннәр кулы белән язылганнары да, басма хәреф белән язылганнары да, линейка белән юл сызып, бизәкләр төшереп язылганнары да бар араларында.Открыткаларның күбесе 80-90нчы елларга карый, ара-тирә 70нче елларны үз эченә алганнары да бар. Ә иң өлкәне - 1956 елның 27 декабрендә язылганы. Открытка үзе 200 мең тираж белән 1955 елның август аенда "Совет художнигы" типографиясендә басылган, тышына художник В.А.Серовның "Зимний взят" картинасы ясалган, бәясе 20 тиен. Сыйныфташы Сафина Розаның Яңа ел котлавын 56 ел буе (!) саклаган кеше - Бәширов Роберт абый. Кызык, Трактор урамы, 31 йорт Әтнәнең кай җирендә урнашты икән?
Сыйныфыма кереп, открыткаларны караган балаларны күзәтәм. Кемгәдер рәсеме бик матур булып тоела, кайберсе үзе алып килгән открытканы күрсәтә. Менә әйт син шуннан соң баланы шаккатырып булмый дип!
Открыткалар... Чормаларда, ниндидер тартма төпләрендә, китап бите арасында бүген дә бик күбебездә сакланадыр әле алар. Минемчә, чыршы исе белән беррәттән, алардан балачак, могҗиза исе дә килә.
* Язмага карата фикерләрегезне www.atnya-rt.ru сайтында калдыра аласыз.
Иң мөһим һәм кызыклы язмаларны Татмедиа Telegram-каналында укыгыз
