Зилә Вәлиева: Тавыш бирүдә санитар нормаларны бозу очраклары теркәлмәгән

Күзәтүчеләр Татарстанда РФ Конституциясенә төзәтмәләр буенча гомумроссия тавыш бирүдә санитар нормаларны бозу очракларын теркәмәгән. Бу хакта Республика матбугат үзәгендә узган матбугат конференциясендә ТР Иҗтимагый палатасы рәисе Зилә Вәлиева хәбәр итте.

«Быел күзәтүдә санитар нормаларны үтәү аерым урын алып тора. Иң мөһиме — тавыш бирүче гражданнарның барлык куркынычсызлык шартлары үтәлеп барды, моңа шигебез юк. Шуңа бәйле рәвештә, санитар таләпләр буенча бернинди кисәтүләр дә булмады диярлек», — диде ул.

Аның сүзләренә караганда, санитар таләпләр, тавыш бирү урынына бәйсез рәвештә, барлык участокларда: мобиль участокларда, йорт яны территориясендә яки стационар участокта үтәлгән.

• Искәртеп үтик, бүген Бөтен Россия буенча РФ Конституциясенә төзәтмәләр буенча тавыш бирү бара. Татарстанда яшәүче 2,9 миллион кеше ихтыяр белдерү хокукына ия. Күзәтүчеләр сыйфатында 16,5 мең кеше теркәлгән.

Чыганак: https://tatar-inform.tatar/news/politics/01-07-2020/zil-v-lieva-tavysh-bir-d-sanitar-normalarny-bozu-ochraklary-terk-lm-g-n-5753666