Ташчишмәлеләр хәрбиләргә коры аш, сухари, маскировка сеткасы әзерләгәннәр

Күптән түгел генә сайтыбызга Ташчишмә авылында узган ярдәм ярминкәсе турында язган идек. Авыл халкының бердәм булуына сокландык. Сокланмый мөмкин дә түгел, һәркөн клубта ит-яшелчәләр киптереп күп хезмәт куйганнар.

- Бергәләшеп эшләгәндә эш тә тизрәк бара, күңел дә күтәренке була, авыл халкы бик булышты, үзең генә тотынып, башкарып чыга торган эш түгел – ди Илсия Мортазина. Продукцияне туплап, тәвәкәлләп эшне башлап җибәрү дә зур көч сорый. Бисмиллаларны әйтеп тутырабыз.  Әзерләгән ашлар тәмле булсын дип тырышабыз. Ике төрле коры аш әзерләдек: борщ белән токмачлы аш. Сухари да киптердек, алар кесәгә тыгып йөрергә җайлы булсын өчен кечкенә пакетларга бүленде.

Килеп булыша алмаган кешеләр дә азык-төлек белән ярдәм иткән.  Азык-төлек авыл халкы ярдәме белән җыелган, ә тавык итен  сатып алганнар.  «Күшәр» хуҗалыгы да ярдәм итеп ит биргән. 

3 маскировка челтәре дә үреп куйганнар ташчишмәлеләр. Өлкәннәр янында яшьрәкләрнең булуы да куанычлы. Бу маскировка челтәре генә түгел. Бу – бердәмлек челтәре.

Ташчишмә халкының бердәмлеге, тырышлыгы башка авылларга да үрнәк булыр дип ышанабыз. 

Бердәмлектә – көч, дигән мәкальдә тирән мәгънә ята.