Мең баш савым сыерына – яңа торак

"Таң" хуҗалыгының Кышлау фермасында савым залы булган тагын бер зур комплекс төзеп яталар.
Бу хакта төзүчеләр бе­лән сөйләштек. Элекке ИП "Төхфәтуллин" хезмәткәрләре эшли биредә. 500 баш савым сыерына исәпләнгән торак­ларның берсен шушы оешма егетләре төзи. Эш барышы белән прораб Фәрит Хә­сәнов таныштырды.
- Әлегә өч төркемгә бү­ленеп эшлибез. Тиешенчә, сыйфатлы итеп башкарабыз, - ди ул.
Монысы - бәхәссез, районда Мөндешнең бу оешма егетләре кулы тимәгән объектлар бик аз. Хәлил Шакиров җи­тәкчелегендәге, барысы 4 кешелек төркем югарыда иде - түбәнең вентиляция шахтасы өлешен ябалар. Рәмис Юнысов, Илдус Нуриев, Фирдүс Гайнетдинов эшне белеп, төгәл һәм тиз башкаралар. Илфат Мифтахов җи­тәкчелегендәге төркем миксер белән китер­гән бетонны сайгак өлешенә салып тигезли.Тагын бер төркем тимер детальләрне грунтовкалап чыккан, хәзер буяу эше белән мәшгуль.
Янәшәдәге тагын бер 500 башлык савым сыеры торагын һәм савым залын Ижевскидан килгән бригада төзи. Бу хакта оешма прорабы Павел Решетниковтан сораштык. Ул:
- Биредә 13 кешелек бригада эшли. Техника да бар: экскаватор, самос­вал, погрузчик, виброкаток... - дип санап узды.
Әйтүенчә, эшне озакка сузмаска исәплиләр. Тиздән әзер булыр, дигән фикердә ул. Чөнки, төп эшләрне тәмамлаганнар инде. Хәзер коммуникацияләрне көйләү генә калып бара.
Торак эчендә тәрбия шарт­лары безнекенә ох­шаш булса да, аз гына үзгәлек булыр кебек. Про­раблар белән бу хакта да сөйләштек. Шул ук азык кертү-тирес чыгару аралыгы булачак, савым сыерлары бәйсез тәрбия­ләнә, дип аңлаттылар. Шулай да терлек йоклый торган якта һәр сыер өчен аерым аралык каралган. "Ул шунда кереп ята", - диделәр.
- Төзелеш барышын һәм аның ахырын күзаллаган хәлдә, бик яхшы булыр дип өметләнәбез. Көзгә тулысынча әзер булачак, - диде зоотехник Реваль Гәрәев.
Автор фотосында: бе­тонлау вакыты. Башка фотоларны atnya-rt.ru сайтында карый аласыз.