«Авыллар бетеп бара»

Татар язучысы, тарихчы-галим, тарих фәннәре кандидаты Нурулла Гарифнең: «Авыл таркалды диләр, аннан күченеп китүчеләр», - дигән сүзләре бар.

Ташчишмә авылына баргач та ишетергә туры килде әлеге сүзләрне. Тик авыл агаеннан.
Өҗем авыл җирлегенә керә әлеге авыл. Ә әлеге җирлек өч авылны берләштерә: Ташчишмә, Мок­шы һәм Иске Өҗем авыл­лары. Ташчишмә авы­лында - 119, Мокшыда - 18, Иске Өҗемдә 56 хуҗалык бар бүгенге көн­дә. Җирлектә барысы 57 бакча яшендәге ба­ла исәпләнә. 55 укучы бе­лем ала (автордан. Әлеге ба­лалар җирлектә пропис­када булсалар да, күбесе шәһәрдә яши). Хезмәт яшендә 291 кеше булса, җирлектә барысы 186 пенсионер гомер кичерә. Биредә гомер итүче халыкның 316сы - ир-ат, 277се - хатын-кыз. Ел ба­шыннан бүгенге көнгә ка­дәр җирлектә 3 бала туган, 14 кеше бакыйлык­ка күчкән.
Ташчишмә авылының Мулланур Вахитов урамында гомер кичерүче Мөдәррис абый Мөхәммәтгалиев белән сөйләшкәндә: «Кызганыч, авыл бетеп бара. Яшь­ләр авыл­дан китә. Кит­мәс иде, эше юк бит аның. Элегрәк мәктәпкә бар­ганда һәр йорт капка­сыннан 5-6 бала чыга торган иде. Ә хәзер чатка кадәр менеп җиткәнче, 3-4 бала була. Үзебезнең урамда гына да буш йортлар бик күп», - дип уфтанып куйды. Борчыган мәсьәләләр турында сорашкач, "Зарланырлык түгел. Урамнарга таш җәйделәр. Узган ел эресен, быел вагын җәеп чыктылар", - диде.
Район үзәгендә иң бор­чыган мәсьәләләрнең бер­се булган чүп-чар ту­рында сүз чыккач, җир­лектә аны атна саен шимбә көнне җыюлары мәгъ­лүм булды. Кышкы чорга кергәч, ике атнага бер тапкыр җыя башлаган­нар. Урам утлары программа нигезендә дә, баш­ка юллар белән дә уңай хәл ителгән. Тик ме­нә су проблемасы әле­дән-әле сиздереп тора. Хәер, алай дип әйтү дә дөрес булмас. Чөнки су күп кешенең өенә кертелгән. Җирлектәге коеларны матур итеп эшләп чыкканнар. Ташчишмә авылында Нургали белән Зыя коеларын сокланып карадык. Иске Өҗем авы­лында су торбаларын өр-яңадан алыштырып чык­салар, Ташчишмә авылының югары очында иске торбалар әледән әле үзләрен сиздереп тора­лар икән.
"Үзара салым акчасына иң борчыган авыл урамы юл­лары уңай хәл ителде", - диделәр җирлектә. Авыл бетә, эш юк, яшьләр китә, дип тормыш бер урында тормый. Замана агымы белән алга бара.
Автор фотосы.