Бай үсмәдек, ләкин ач үсмәдек...

Бай үсмәдек, ләкин ач үсмәдек
Заманына күрә авылда.
Ярып пешерелгән бәрәңгенең
Тәмен тоям һаман авызда.

Тәм-том безгә бик күп эләкмәде.
Сөтен куйды әнкәй иртәнге,
Үзе салган кайнар икмәк куйды,
Куйды ярып пешкән бәрәңге.

Шөкер, хәзер ач замана түгел.
Кулым төрле аш-су пешерә.
Ләкин үсмер чакның бәрәңгесе
Авыз суларымны китерә...

...Тулып тора кунак өстәлебез.
Сый артыннан сыйлар өстәлә.
Ярып пешкән кайнар бәрәңгесен
Куяр микән әнкәй өстәлгә?..