Кече залда күңелле маҗара

Габдулла Тукай исемендәге Әтнә дәүләт драма театры яшь тамашачыларга гаять мавыктыргыч музыкаль әкият әзерләгән.

Музыкаль спектакль театрның кече залында де­кабрьнең соңгы көннә­рен­дә аншлаг белән дә­вам итә. Әкиятне тамаша кылырга теләүчеләр чи­рат торалар, диделәр. Шу­лай булмый ни, заман­ча элементлар кыс­ты­рылган "Кәҗә белән сарык маҗаралары"н күз алдына китерегез әле! Хәер, барып карарга ки­рәк бу музыкаль әкиятне...
"Малай белән Акбай"­ны да, "Күбәләк"не дә урынлы һәм уңышлы кул­ланганнар. Ә инде бүреләрнең: "Кысыр бот­ка казанда, без тагын ура­зада", дип өзгә­лә­нү­ләре гаять кызык ки­леп чыккан. Кыскасы, зал тамашачы балаларның көлгән авазыннан өзелмәде. Әйтүләренчә, спектакльне районның якын-тирәдәге барлык мәктәпләре дә тамаша кылган инде.
Аны шундый мавык­тыргыч итүчеләрне - артистларны телгә ал­масам мәкаләм тулы бул­мас. Әби ролендәге Фирдания Хәйруллина, Ба­бай ролен башкарган Камил Бәйрәмов, Кәҗә-Кәҗүл - Илфат Шәрифуллин, Сарык-Бәркә - Алинә Сидеева, Малай - Раил Сәләхиев, Акбай - Гөлинә Шәйхетдинова, Шүрәлия - Ләйсән Каюмова, Бүреләр - Гүзәл Гафарова, Зөһрә Хөсәенова, Лилия Мөхәммәтҗанова, Фәнзилә Гыйльметдино­ва нык тырышканнар. Алар гынамы соң, спектакль­не сәхнәләштерүдә компози­тор Марат Әхмәтшин, рәс­сам Сергей Скоморохов та зур көч куйганнар. Шу­ңа игътибар иттем, театр директоры Ленур Зәй­нуллин да спектакль ба­рышын дулкынланып күзәтте.
Соңыннан бу музыкаль әкият хакында режиссер Дамир Сидеевтан сораш­тык.
- Спектакльне сәхнә­ләштерүдә Тинчурин исе­мендәге театр артис­ты Илфак Хафизов нык бу­лышты. Бу уңайдан бе­ренче чиратта театрыбыз­ның баш режиссеры Рамил Фазлыев­ны телгә алу урынлы булыр, - ди ул.
- Ни өчен нәкъ менә "Кәҗә белән Сарык ма­җа­ралары"?..
- Театрыбыз Габдулла Тукай исемен дә йөрткәч, бөек якташыбыз әсәр­ләрен сәхнәләштерер­гә уйладык. Аннан соң, әле­ге спектакль яшь буын­ның Габдулла Тукай әкиятләрен белеп үсүенә этәр­геч булсын иде.
- Яшь буын ел да сезнең әсәрләргә сокланып үсә...
- Дөрестән дә, игътибар иткәнсездер - спектакльне балалар бик яратып тамаша кылдылар... Ышаныгыз, монысы соңгысы булмас!
Автор фотосы.