Нечкә муен, пар кыллар...

Чиертер иде бар куллар, яшьләр уйный белмиләр - шуңа якын килмиләр.

Нәрсә булыр икән бу, дисезме? Мандолина турында сүзем. Ә бездә мандолинада уйнаучылар бик сирәк. Нәкъ табышмактагыча, яшьләр бик уйный белми. Өлкәннәр арасында исә Бәрәскә авылыннан мандолинада уйнаучы ветеран-укытучы Әлфинур Хәйретдинованы белмәгән кеше юктыр. Әлфинур апа "мин" дип кычкырып йөри торганнардан түгел, бик тыйнак, сабыр кеше. Тумышы белән ул Шимбер авылыннан. Мандолинага мәхәббәте дә әнә шул мәктәпнең башлангыч сыйныфында укыганда бөреләнә аның. "Башлангыч сыйныф укытучысы Кәшифә апа Гарифуллина тәнәфес вакытларында бик матур итеп мандолинада уйный иде. Аның уйнавына кызыгып карап торганмын күрәсең, миңа да өйрәнергә тәкъдим итте. Әнә шул Кәшифә апаның ярдәме белән үзлегемнән өйрәндем мандолинада уйнарга." 34 ел педагогик стажы булган Әлфинур апага укыту чорында да бик ярдәм итә бу һөнәре. Еллар узып, җитди авырулар кичергәннән соң, кабат кулына мандолина ала ул. Монысы - район ветераннар советы рәисе Мингазиз ага Зиннәтовның тынгысызлыгы белән. Өлкәннәрнең тормышына җан өргән Мингазиз абыйны " үз эшенең чын остасы, энтузиаст, һәр эштә дә башлап йөрүче" буларак бәяләде Әлфинур апа. Ветераннарны сәхнәгә менгерүче кеше дә нәкъ шул Мингазиз абый бит. "Балкыш" фестивалендә катнашып, Казанга филармониягә чакыру ала. Әлеге концертта катнашу мөмкинлеген булдырган өчен район мәдәният бүлеге җитәкчесе Азат Хәйретдиновка, баянчы Фарис Биккининга, шул ук Мингазиз абыйга бик рәхмәтле ул. "Фариста көйне тоемлау сәләте бик көчле. Чыгыш ясаган вакытта аның ярдәме бик зур", - ди Әлфинур апа. Филармониядән дипломант исеменә лаек булып кайта ул. Мандолинада уйнаучылардан бер үзе чыгыш ясый. Тәэсирләре дә бик көчле: "Филармонияне беренче тапкыр күрдем. Бик якты, матур бина. Чыгыш ясаучылар арасында 90 яшьлек сугыш һәм хезмәт ветераны да бар иде. Әлмәтлеләр бик матур чыгыш ясады. 80 кешелек җыелма хор белән килгәннәр, бөтенесендә искитмәле матур киемнәр. Үзебезнең районда мондый хор булдыру бик күркәм күренеш булыр иде", - ди ветеран музыкант.

Әлфинур апа киләчәктә дә үзенең иҗаты белән сөендерер дип уйлыйм. Ә без аңа бары уңышлар гына юлдаш булсын дигән теләктә калабыз.