“Щелкунчик” – укучыларга бүләк

Габдулла Тукай исемендәге Әтнә дәүләт драма театры бинасында балалар өчен район "Чыршы бәйрәме" булып узды.

Әлеге бәйрәм чарасына район мәктәпләренең иң-иңнәре - "бишле" билгеләренә генә укучылар, олимпиадаларда приз­лы урыннар алучылар, төрле спорт чараларын­да катнашып үз мәктәпләренең данын яклаучылар, зур җиңүләргә ирешүчеләр - барлыгы 120 укучы чакырылган иде. Алар ара­сында әле күптән түгел генә мавыктыргыч белем дөньясына аяк басканнары да, инде зуррак сыйныфларда белем алучылар да бар иде.
Мәктәптән тыш эшләр үзәге белгечләре тара­фыннан әзерләнгән бәй­рәм тамашасын үзәк­нең өстәмә белем би­рү педагогы Лилия Әх­мәтова үзенең нәни яр­дәм­челәре белән алып барды. Сәхнәдәге та­ма­ша барышында Яңа эт елы узган Әтәч елын алыштырды, укучыларны Кыш бабай белән Кар кызы котлап, бүләкләрен тапшырды. Сәхнә түреннән бөркелгән бәйрәм рухы залдагыларны да чолгап алды, кәефне кү­тәр­де.
Алдынгыларны бәйрәм белән котларга район хакимияте башлыгы Габделәхәт Хәкимов үзе дә килгән иде. Ул укучыларга үзенең иң изге теләкләрен җиткерде - ки­ләчәктә дә сынатмыйча, яхшы билгеләренә генә укуларын теләде. Соңрак - Казан дәүләт мә­дәният институтының халык бию­ләре кафедрасын­да бе­лем алучы яшь артистлар тарафыннан куелган кү­ренекле композитор Петр Чайковскийның дан­­лыклы "Щелкунчик" ба­летын карап уздылар. Укучылар өчен чыннан да зур бүләк булды бу. Балет шәһәрдә яшәүчеләр өчен дә тансык тамаша бит.