Синең янда

Синең янда гына, әнкәй җаным,
Тормыш авырлыгы югала.
Синең янда гына талчыккан һәм
Арып-талган йөрәк тын ала.

Бусагаңнан атлап керү белән
Тышта кала барлык борчулар.
Әллә кая була үпкә-рәнҗү,
Бетә кимсенүләр, ачулар.

Синең янда беразга булса да
Авызлыгын тормыш бушата.
Әрем кушмый гына, баллап-майлап
Яңа пешкән күмәч ашата.

Синең янда күңелемне били
Күптән көткән талгын җиңеллек.
Синең янда гына мине, әнкәй,
Бәхет көтә таудай өелеп.