Әтнәдә ЮХИДИ инспекторлары рейд үткәрде

Чәршәмбе көнне кичке якта район ЮХИДИ бүлеге җитәкчесе Рифат Нурмехәмәтов һәм инспектор Рамил Гәрәев юлларда кагыйдәләнең үтәлешен тикшерү максатыннан махсус рейдка чыкты. Әлеге рейд нәтиҗәсендә тизлекне тиешледән арттырган өчен машина йөртүчеләргә 4 протокол төзелгән. Ике машина йөртүче куркынычсызлык каешын такмаган өчен, тагын 2 се балаларны махсус креслосыз йөрткән өчен административ җаваплылыкка тартылган. Шул ук вакытта, газета битләрендә һаман кисәтеп язып торып та, штрафларын вакытында түләргә ашыкмаучылар да бар икән. Әнә шундый 2 райондашыбыз ваемсызлыклары нәтиҗәсендә штрафларын икеләтә күбрәк түләячәк.