Әтнәгә Президент килде

Бүген Татарстан Республикасы Президенты Рөстәм Миңнеханов Әтнә районының хуҗалык, предприятие, оешма җитәкчеләре белән очрашты.
Эшлекле сәфәренең максаты - язгы кыр эшләре барышы белән танышу булса да, республика Президенты очрашуга килүчеләр белән аралашырга да вакыт тапты.
Башта район башлыгы Габделәхәт Хәкимов озатуында "Таң" хуҗалыгының Кышлау фермасында төзелүче чираттагы тораклар комплексын карады. Комплекс белән хуҗалык җитәкчесе Алмаз Сибагатуллин таныштырды. Рөстәм Миңнеханов та, аның белән бергә килгән вице-премьер, Татарстан Респуб­ликасының авыл хуҗалыгы министры Марат Әхмәтов та яңа төзелеш объекты белән нык кызыксындылар.
Соңыннан шунда ук узган очрашуны Татарстан Президенты хәл-әхвәлне сораштырып башлады. Проблемалары булучыларны ачыктан-ачык сөй­­ләшүгә чакырды.
- Игенчелектә, аерым алганда язгы кыр эшләре барышы буенча районга тел-теш тидерерлек түгел, - диде Рөстәм Миңнеханов.
Ә терлекчелектәге уңыш­­­лар белән Габдел­әхәт Хәкимов таныштыр­ды. Районда республика җи­­тәкчеләре кызыксынган Президент Программалары буенча да эшнең яхшы оештырылуын ассызыклады.
- Шулай да иң мөһиме тормыш дәрәҗәсе булуын онытмагыз - сәламәтлек саклау, мәгариф, шулай ук кече эшмәкәрлек алгы планнарда булсыннар, - дип тәмамлады сүзен Татарстан Президенты.