Әтнәнең Күлле Кимедәге яңа ферма торагы күзне ерактан ук иркәли

Ул чакта биредә Ижевскидан килүчеләр металл конструкцияне җыялар иде. Кабат шушы торакны искә алырга туры килә... Күәм-Каенсар арасындагы агачлык полосаны узуга, ерактан ук үзенә дәшеп, яшел түбәләре белән ялтырап, күзне иркәли башлый ул.

Шактый эш башкарылган биредә. Түбәләре - яшел, стеналары сөтле чәй төсендәге профнастил белән тышланган (сөт белән бәйле булгачтыр инде). Гадәттә ферма торакларының үзенчәлекле төстә булуына күнеккән, ә бу ул яктан шәхси хуҗалык йортларына якын. Төзелеш участогы начальнигы Радик Җәләлдинов белән әңгәмәне шул хакта сөйләшүдән башладык.

- Дөрестән дә үзенчәлекле, бу әлегә беренче торак кына. Киләчәктә бу территориядә мондый тораклар төзелешен дәвам итәргә була, - ди ул.

Биредә СК "Нефтепродуктстрой" җаваплылыгы чикләнгән җәмгыятенең 40лап төзүчесе эшли. Алар белән югарыда телгә алган участок начальнигыннан тыш, мастер Илназ Абдуллин да җитәкчелек итә. Төзүчеләр машиналарда Казанга кайтып-китеп йөриләр. Араларында "Арскнефтепродуктстрой"ның төзелеш бригадасында эшләүче үзебезнең якташлар да бар.

Торак үзе 580 баш савым сыеры өчен дип төзелә. Размеры 126 X 38 метр тәшкил итә. Кыскасы, зур һәм иркен була бу торак. Урта тирәдә аңа сөт блогы тоташа, анысы да кечкенә түгел - 36 X 18 метрлы була.

Торакның тышкы эшләрен тәмам дияргә була, шуңа бик матур булып ялтырый ул! Тиздән ишек-тәрәзәләре куела, диделәр. Аңлавымча, эчке эшләрен дә бик сыйфатлы итеп башкаралар. Грунтовка белән кат-кат буялган тимер каркасларга игътибар иттем. Төзелеш барышын җитәкчелек гел күз уңында тота икән.

Вентиляция шахталары эшләүче егетләр таныш тоелдылар. Күәм егетләре икән - Роберт Низамов һәм Рафис Садриев белән бергә торакка тагын бер сокландык. Эш вакытында аларны фотога да төшереп алдым.