Вакцинация – сораулар һәм җаваплар

Кыш якынлашкан саен салкын тидереп авырту куркынычы да арта. Быел гриппның әллә нинди куркыныч төре килә дип, күптән шик салып куйдылар инде күңелгә.
Инфекцион авырулар арасында социаль әһәмияте ягыннан грипп чыннан да беренче урын­да тора. Эпидемия ва­кытында әлеге авыру җирдә яшәүчеләрнең 10-20, ә өлкән яшьтәге­ләрнең 40 процентын зарарларга мөмкин. Ел са­ен гриппның авыр фор­малары белән авыру­чы­­лар саны миллионлап исәпләнә, үлүчеләр са­ны исә 200-500 меңгә җи­тә. Әлеге саннар үзеннән үзе әлеге куркыныч авы­ру­ны булдырмау мак­­са­тыннан профилак­тик чаралар күрүгә этәр­­геч булып тора. Ә ин­де мондый чараларның иң ышанычлысы - вак­ци­­нопрофилактика. Гриппка каршы вакцина эш­ләтү беренче чиратта авы­ру эләгү куркынычы зур булган затларның авы­руга каршы торучанлыгын ныгытуга юнәлдерелгән. Шушы уңайдан Россия Федера­циясе сәламәтлек сак­лау министр­лыгы яше, сәламәтлеге, һөнәри эш­чәнлеге буенча авыру эләк­терү куркынычы зур булган 6 айдан өлкән һәр­­кемгә вакцина ясатыр­га киңәш бирә. Гриппка каршы вакцинация ясату зур икътисади әһәмият­кә дә ия. Привикага тотылган бер сум авыру кешене терелтүгә, больничный листны түләүгә тотылган чыгымнарны ки­метү хисабына 3тән 6 га кадәр, ә кайбер мәгъ­лү­матлар буен­ча 25 сумга ка­дәр экономияләргә мөм­кинлек бирә.
Гриппка каршы вакцина - ясатыргамы, юк­мы?
Үзенең һәм балаларының, якыннарының сә­ламәтлеге турында кай­гыр­тучы һәркем үз-үзе­нә "Грипптан привика ясарга кирәкме?" дигән сорау куймыйча калмый. Грипп вируслары бик тиз үз­гәрүчән. Шуңа да безнең иммун системасы үз­гәргән грипп вирусы белән очрашканда, аны яңа, моңарчы билгеле булмаган вирус кебек кабул итә. Иммун сис­те­масы әлеге вируска каршы тәнчекләр эшләп ч­ыгарган арада кеше нык­лап авырый башларга мөмкин. Ел саен була торган сезонлы авыруларның артуы нәкъ менә ви­русларның үзгәрүчәнлеге белән бәйле дә инде. Вакцинациядән һәм грипп белән авырганнан соң организмда саклагыч тәнчекләр барлыкка килә. Ләкин алар ярты елга кадәр генә саклана. Икенче елны гриппның яңа вирусы килгәндә, безнең иммун системасы әзерлексез була һәм без кабат авырыйбыз. Вирусны кабул итүгә әзерлекнең иң яхшы ысулы - прививка.
Гриппка каршы вакциналар ни белән аерыла?
Вакциналар ике төрле була. Алар үзара кертү юлы белән аерыла. Шулай ук вакциналарны кешенең яшенә карап та аерып була.
«Ультрикс «исемле вакцина 6 яшьтән олы балаларга кадала. «Совигрипп детский «- 6 айдан һәм өлкәннәргә дә кадала. «Совигрипп взрослый исә 18 яшь һәм өлкәнрәкләр өчен. Һәр елны вакцина составына грипп вирусының белгечләр билгеләгән шул елга хас вариантлары кертелә. Прививка ясалып, 14-21 көн узганнан соң, кеше организмында гриппка каршы иммунитет барлыкка килә. Шул ук вакытта вакцинация организмда төрле реакция дә китереп чыгарырга мөмкин. Температура яисә укол кадалган урын кызарып тору - теләсә кайсы вакцина кадаганнан соң да булырга мөмкин. Бу - закончалык.
- Әтнә үзәк хастаха­нә­сендә дә вакцинация эшләтү буенча кызу эш бара. Табиблар каршында быелгы сезонга 5210 кешегә привика ясату бурычы куелган. Шуның 1160 - балалар, 4050се - өлкәннәр. Бүгенге көнгә барлыгы 985 балага прививка ясалган. Сентябрь-октябрь айлары прививка ясату өчен иң уңай вакыт. Соңга калабыз дип борчыла күрмәгез. Шушы арада прививка кадалырга тиеш һәркемгә вакцинация ясалып бетәр дип уйлыйм, - ди табиб-эпиде­миолог Гөлия Мифтахетдинова.