Күрше төбәктә ау вакытында полиция хезмәткәре бер ир-атны атып үтергән

Марий Эл Республикасында ау вакытында 48 яшьлек ир-атны атып үтергәннәр. Горномарийский районара тикшерү бүлеге «саксызлык аркасында кеше үтерү» маддәсе буенча җинаять эше ачкан. Бу турыда Россия Тикшерү комитетының Марий Эл Республикасы буенча тикшерү идарәсенең матбугат хезмәте хәбәр итте.

Тикшерү версиясе буенча, полициядә эшләүче 43 яшьлек ир-ат ял итә торган вакытында Марий Эл Республикасының Горномарийский районындагы авылларның берсе янында урнашкан урман массивына ауга чыга. Биредә ул мылтыктан ата. Ядрә икенче аучыга — 48 яшьлек ир-атка тия. Ул да биредә яшәүче кеше була. Яраланган ир-ат урында ук үлә. 

Хәзерге вакытта тикшерү эшләре бара, диелә бу хәбәрдә.

«Комсомольская правда» сайты мәрхүм ир-атның биредәге эшмәкәр булуын ачыклаган. 43 яшьлек аучы кыштырдаган тавыш ишеткәч, арттан кабан килә дип уйлаган һәм мылтыктан аткан. Ядрә 48 яшьлек эшмәкәр ир-атның муенына тигән. Ул ашыгыч ярдәм килгәнче вафат булган, диелә бу хәбәрдә.

 Чыганак : https://intertat.tatar/news/incident/20-11-2020/k-rshe-t-b-kt-au-vakytynda-politsiya-hezm-tk-re-ber-ir-atny-atyp-terg-n-5786867