Татарстанда коронавирус инфекциясе йоктырган кешеләр саны 23 меңгә җитте

Татарстанда соңгы тәүлектә Covid-19 коронавирус инфекциясе йоктыруның 43 яңа очрагы ачыкланган.

ТР Сәламәтлек саклау министрлыгының матбугат хезмәтеннән хәбәр итүләренчә, өч кеше чирне читтә йоктырып кайткан, калганнары башка авырулар белән аралашу нәтиҗәсендә эләктергән.

«12 кеше хастаханәгә озатылган, 31 кеше өендә дәвалана», — диелә ведомство хәбәрендә.

Казанда — 20, Чаллыда — алты, Биектау, Зәй, Яшел Үзән һәм Түбән Кама районнарында — икешәр, тагын тугыз муниципалитетта берәр яңа очрак ачыкланган.

Тулаем алганда, пандемия башланганнан алып республикада коронавирус инфекциясенең 23 мең очрагы ачыкланган, 20 570 кеше (шуларның 115е — узган тәүлектә) терелгән.

Республикада барлыгы 667 978 кеше (шуларның 12 294е — узган тәүлектә) коронавируска каршы прививка ясаткан. 438 114 кеше икенче дозаны да алган.

Чыганак: https://tatar-inform.tatar/news/health/13-07-2021/tatarstanda-koronavirus-infektsiyase-yoktyrgan-keshel-r-sany-23-me-g-itte-5830100