Әтнә районындагы мәдәният
Әтнә районы мәдәният өлкәсе хезмәткәрләре ел әйләнәсе халкыбызга рухи азык өләшеп яшәүдә, Казан арты халыкларының милли гореф-гадәтләрен, йолаларын саклау, үстерү, буыннан-буынга тапшыруда күп көч куя.
-
Әтнә районындагы мәдәни объектлар
Тасвирлама: Әлеге бүлектә Әтнә районы мәдәният объектлары адресы, фотолары, эш/тәнәфес вакыты, картада урнашу урыннары, сайтлары, социаль челтәрләре күрсәтелгән һәм мәдәни үзәкләр турында гомуми мәгълүмат язылган.
-
Әтнәнең «Туган ягым» ял паркы
Тасвирлама: Әлеге бүлектә Әтнә паркларының адресы, фотолары, картада урнашу урыннары күрсәтелгән һәм парклар турында гомуми мәгълүмат бирелгән.
Мәдәният йортлары һәм үзәкләреннән тыш, Әтнә үзенең ял паркы белән дә билгеле.
«Туган ягым» паркында балалар өчен уен зоналары, йөрү һәм велосипедта йөрү урыннары, шулай ук Бөек Ватан сугышына багышланган стенд урнашкан. Паркта төрле чаралар һәм фестивальләр үткәрелә.
«ӘтнәТуй»
«Туган ягым» паркында ике ел элек, беренче тапкыр, “ӘтнәТуй” фольклор-этник фестиваль узган иде. 2024 елда кабат узды.
II нче район ачык фольклор-этник фестивальнең төп максатлары: Казан арты халыкларының милли гореф-гадәтләрен, йолаларын саклау, үстерү, буыннан-буынга тапшыру; традицион халык культурасын һәм фольклорын торгызу һәм пропагандалау; үсеп килүче яшь буында башка республикалар традицияләренә һәм мәдәниятенә карата хөрмәт тәрбияләү; үсеп килүче буынны халык сәнгатенең иң яхшы үрнәкләрендә патриотик, әхлакый, эстетик яктан тәрбияләү; аерым башкаручыларның һәм сәнгать коллективларының башкару осталыгын камилләштерү; милләтара һәм регионара мәдәни хезмәттәшлекне киңәйтү; традицион фольклорны саклаучы халык башкаручыларын ачыклау һәм аларга ярдәм итү.
«ӘтнәТуй» фольклор этник-фестивале халык авыз иҗаты җәүһәрләре ярдәмендә гаиләдә һәм җәмгыятьтә туган телебезне, асыл гореф-гадәтләребезне кадерләп сакларга, милли рухыбызны югары күтәрергә мөмкин икәнлеген раслаучы тагын бер фестиваль.
Иң мөһиме дәвамлы булсын.
Әтнә театры
Һәр шәһәрдә дә дәүләт театры юк. Һәвәскәр театрлы авыллар бик сирәк.
Ә үзе театрны тудырып, йөз ел дәвамында яшәтеп, үстереп, профессиональ дәрәҗәгә күтәреп, дәүләт статусына ирештергән авыл бөтен илебездә бер генә.
Ул – Әтнә!
Дәүләт статусын алып, игелекле хезмәтен дәвам иткән театр бүгенге көндә үз сәхнәсендә спектакльләр кую белән генә чикләнми.
Коллектив һәрчак юлда. Мәскәү, Казан, Себер калаларының иң дәрәҗәле сәхнәләре генә түгел, моңарчы бер генә театр да аяк басмаган иң кечкенә, иң ерак татар авылларын да урап узмый алар.
Әтнәлеләр өчен һәр тамашачы кадерле. Зыялы-затлы шәһәр театрымы ул, авыл кешеләреме — һәркемнең зәвыгына туры килердәй, күңелен рәхәт сулкылдатырдай, иң таләпчән тәнкыйтьчеләрнең дә хуплау катыш соклануына лаек бай репертуарлары, әдәби материалны иң югары кимәлдә, фәлсәфи тирәнлек белән сәхнәгә күтәрердәй режиссёрлары, онытылмас образлар тудырырга сәләтле артистлар труппасы булган Г. Тукай исемендәге Әтнә дәүләт драма театры — Казан арты төбәгенең хәзинәсе, бөтен татар дөньясының горурлыгы ул.
Әтнә балалар сәнгать мәктәбенең «Сәхнәдәш» үрнәк балалар театр коллективы һәм дә Олы Мәңгәр мәдәният йорты каршында оештырылган «Әкият иле» балалар курчак театры чыгышларын берничә тапкыр карасаң да, карап туеп булмый. Балаларның, нәни артистларның үткенлегенә сокланырлык.
Олы Мәңгәр мәдәният йорты каршында эшләп килгән «Чулпан», Кышлау авылының «Чишмә» фольклор ансамбльләре чыгышы һәр узган чарада да югары бәяләнә.
Әтнә мәдәнияты – безнең даныбыз ул.