Таиланд пляжларында тәмәке тарткан өчен бер елга иректән мәхрүм итәргә мөмкиннәр

Россия Федерациясе илчелеге туристлар өчен кисәтү таратты.

Таиландның танылган пляжларында тәмәке тарту тыела. Бу хакта Таиландтагы Россия Федерациясе илчелеге махсус кисәтү тараткан, дип яза ТАСС агентлыгы.

"Әйләнә-тирә мохитне пычранудан саклау максатыннан 1 ноябрьдән Таиландның 20 пляжында тәмәке тарту тыела. Тәмәке тарту махсус урыннарда гына рөхсәт ителә", - диелә хәбәрдә.

Кагыйдәне бозган кешеләргә зур күләмдә штраф яки төрмәгә ябылу куркынычы яный. Штраф күләме 3 мең доллардан артып китә, диелә. Ә иректән мәхрүм итү вакыты бер елга кадәр җитәргә мөмкин.

Тәмәке тарту тыелган пляжлар Пхукет утравы, Паттайя һәм Хуахин курорт шһәрләрендә урнашкан.

Чыганак: http://tatar-inform.tatar/