Сайлауга килүчеләргә гриппка каршы прививка да ясадылар

11,12 сентябрь алдан тавыш бирү көннәрендә дә, сайлауга килүчеләргә гриппка каршы прививка ясаганнар иде. Әлеге чара бүген дә оештырылды. Район үзәк больницасы хезмәткәрләре 997 һәм 998нче сайлау участокларында өч көн дәвамында гриппка каршы прививка ясадылар.

Грипп вирусы китереп чыгарган сулау юлларының инфекцион авыруы, сулыш алу системасының үткен вируслы авырулары (ОРВИ) арасына керә. Бүген гриппның 2 меңгә якын төре билгеле. Гриппка каршы профиликатика чарасы буларак, көз көне вакцинация үтәргә киңәш ителә.

Грипп эпидемиясе ел саен, гадәттә, елның суык вакытында кабатлана һәм Җир шарында яшәүче халыкның 15 процентын зарарлый. Дөньяда грипп авыруы белән 500 миллион кеше авырса, шуның 2 миллионы вафат була.

Грипп - авыр вируслы инфекция. Ул, гадәттә, сөйләшкәндә, төчкергәндә, йөткергәндә кешедән кешегә иярә. Табиблар, грипп кинәт башлана, диләр. Тән температурасы 38-39 градуска кадәр күтәрелә, мускуллар сызлый, баш авырта. Аннары йөткерү, томау өстәлергә мөмкин.
Гриппны аеруча балалар, авырлы хатын-кызлар, өлкәннәр авыр кичерә. Грипптан соң организм аеруча сизгергә әйләнә, төрле авырулар эләктерү, өзлегү очраклары ихтимал. Грипп аркасында кайбер кешеләрдә пневмония, йөрәк-кан тамырлары авырулары, менингит, колак, авыз куышлыгы авырулары күзәтелә. Үлү очраклары да бар.