CVV-кодны беркемгә дә әйтергә ярамавына халыкны һаман күндерә алмыйбыз, дип уфтана Эчке эшләр министры урынбасары.

Мошенниклык еш кына әнә шул банк картасы артындагы кодны әйтү аркасында килеп чыга. «Коронавируска каршы көрәштә кешене битлек кияргә өйрәттеләр, күпме генә ролик ясасак та, CVV-кодны беркайчан әйтергә ярамый дип халыкны һич күндерә алмыйбыз. Кеше арттагы кодны әйтә дә, акча югала», — диде Татарстанның эчке эшләр министры урынбасары Владимир Изаак ТР Министрлар Кабинетында брифингта.

Ул акчалар әллә ничә банк счеты аша узарга мөмкинлеген, югалган акчаларны табу шактый кыен булуын әйтте.

Аның сүзләренчә, аферистлар тозагына ешрак яше 30 дан арткан кешеләр эләгә. «30-50 яшьтәге кешеләр аеруча еш алдана. Алар 46-47 процент. 18-30 яшьтәгеләр 26 процент, олырак кешеләр 13 процент тәшкил итә», — диде.

«Җинаятьчеләр теләсә-нинди ысуллар белән эш итә. Интернетта программалар күптөрле, мошенниклар нәкъ банк җибәрә торган смс кебек үк смс җибәрәләр. Банкның куркынычсызлык хезмәтеннән, я менеджер шалтыратып, берничә сорау бирәләр, алар банк картасы турында бөтен мәгълүматны, картаның кире ягында куркынычсызлык кодын теләсә нинди юл белән белергә тырышалар. Гражданнар я пин-код белән бутыйлар, я ышаналар да әйтәләр», — диде Владимир Изаак.

Фоточыганак: https://pixabay.com/ru/illustrations/мультипликационный-персонаж-идея-2934389/