Әтнә таңы

Исән чакта хөрмәтләп калыйк

Иске Мәңгәр авылында гомер кичерүче Ахунҗан абый Газизовка шушы көннәрдә 90 яшь тулды.

Ахунҗан абыйның да бала чагы, яшүсмер еллары яшьтәшләренеке ке­бек үк дәһшәтле сугыш елларына туры килә. Тормышның авыр йөген әнә шул вакыттан ук тартыр­га туры килә аңа. Әнисе үлеп китеп, алты бала үги әни белән үсә алар. 13 яшьлек үсмергә 15 яшьлек апасы белән бергәләп урман кисәргә дә барырга туры килә. Ул чактагы күргәннәрен, ачлыктан интеккәннәрен гомер буе хәтер түрендә саклый  Ахунҗан абый. Иң курык­каны – ачлык була аның. Шуңа да балаларына кечкенәдән үк “Теләгән нәрсәгезне ашагыз”, – дип өйрәтә, табыннары гел мулдан була аларның.
Тормыш иптәше Нурдидә апа белән биш бала тәрбияләп үстерәләр – дүрт егет һәм бер кыз. Һәркайсы тормышта үз урынын тапкан. Бер уллары гаиләсе белән Биектауда яшәсә, калганнары әти-әни яныннан ерак китмәгән. Дүрт улына дүрт йорт салып биргән кеше ул Ахунҗан абый. Уллары да үзе кебек, уңган-булган. Илһамнары күрше-тирә авылларда танылган балта остасы. Авылда күп еллардан бирле почтальон хезмәтен зур тырышлык белән башкарып, авылдашлары хөрмәтен казанган тормыш иптәше Резеда белән ике кыз үстерделәр. Сеңелләре Илһамия исә гаиләсе белән Олы Мәңгәр авылында яши, күмәк хуҗалыкта бозаулар карый.
Олы юбилее уңаеннан әти-әниләре янына төп нигезгә барлык балалары да җыелган иде Газизовларның. Юбилярны котларга район башкарма комитеты җитәкчесе Айрат Каюмов, социаль яклау бүлеге җитәкчесе Әминә Галиева килде. Олы Мәңгәр авыл җирлеге рәисе Фәнис Төхвәтуллин, җирлек ветераннар советы рәисе Хәлимә Закирова да Ахунҗан абыйны чын күңелдән олы юбилее белән котлап, изге теләкләрен җиткерделәр.
Озак еллар тимерчелектә эшләп, тормышын туган колхозына багышлаган хөрмәткә лаек затны “Мәңгәр” күмәк хуҗалыгы җитәкчесе Тәлгать Мос­тафин үзе дә шәхсән котлап узды. Монысы инде өлкән яшьтәге колхозчы өчен хөрмәтнең иң олысы. Тырыш хезмәтләре белән авыл хуҗалыгы үсешенә зур өлеш керткән өлкән абый-­апаларны шулай зурлау матур гадәт булып китсә, бигрәк тә күңелле булыр иде. Алар моңа бик лаек.

Автор фотосы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: