Чабата үреп үскән кыз бала

Күптәнге таныш ул – сыйныфташым Надирнең әнисе. Ни кызганыч, улы бу көнне күрә алмады... Нәкыя апа да улының сыйныфташларын – Күәм авыл җирлеге башлыгы Ленар Сә­ми­гул­линны һәм мине кат-кат кочак­лап: 
– Улларым сез минем, кадерлеләрем, – дип кабатлады.
Кабат кызганычка каршы дияргә туры килә, берничә ай элек җәмәгате Гарифҗан абый да гүр иясе булды.
– Бик яхшы, искиткеч акыллы иде ул. Аны бик сагынам, – дип өзгәләнә Нәкыя апа.
Туган көн турындагы мә­каләне әнә шулай күңелсез миз­гелләрне искә алып башларга туры килде. Нишлисең бит, тормышта бик күпне күргән, бик күп кичергән шул Нәкыя апа.
Җәмәгате белән якты хыялларга төренеп, киләчәккә матур планнар төзеп 4 балага гомер бүләк итәләр алар. Динә, Ләйлә, Дилбәр исемле кызлардан соң, Надир исемле төпчек уллары дөньяга килә. 
Бик зур өметләр баглаган, бик яхшы укып, зур белгеч – табиб булып әверелгән Дилбәр дә инде гүр иясе. Ә менә аның кызы – Нәкыя апаның оныгы җәмәгате белән Ницца шәһәрендә гомер итә.
Юбилярның Франциядәге иң матур җирдә – диңгез буенда төшкән фотосын күреп сок­ланмагаек әле?! Үзенә шул хакта әйткәч, “Инде хәзер үк баргандай булдым”, дип ихлас көлде... 
Гомумән алсак, бик матур гомер итте бу гаилә. Балалар тырышып, әти-әни йөзенә кызыллык китермәслек итеп укыдылар. Гарифҗан абый һәм Нәкыя апа тирә-яктагылар сокланырлык итеп эшләделәр.
Нәкыя апа 4 баланың берсе булып шушы Әйшиязда ук туып-үсә. Узган елны юбилее белән котлаган Шамил абый Закировның бертуган сеңлесе ул.
Кечкенәдән авырлыклар кү­реп үсә алар. Чөнки әтиләре Бөек Ва­тан сугышында хәбәрсез югала. Шуңа күрә газетабыз герое Нә­кыя апа да “эш арбасы”на бик ир­тә җигелә. Һөнәрчелекне, аерым алсак, чабата үрүне күзл­әре яшьләнеп искә ала. Бары әни кул астында калган 4 баланы – үзләрен кабат искә төшерде, кү­рәсең. Ашау-эчү такы-токы булса да, әнә шул әни белән булу бар­лык авырлыкларны оныттыра. 
Соңрак, Нәкыя апа да, җә­мәгате дә данлыклы “Игенче” колхозында эшлиләр. Кыскасы, эшләп үскән буын вәкиле ул мәкаләм герое: фермада эшли, төрле эшләр башкара.
– Ә бүгенге көндә ике кызым тәрбиясендә мин, – дип куана.
Тагын да куанычлырагы – инде 6 оныгы да бар. Баланың баласы балдан татлы шул ул.
Нәкыя апа белән саубуллашканда аның 95 еллык юбилеенда кабат очрашырга сүз куештык. Хәер, монысы кыскача шаярту гына. Аңарчы ук күрешергә язсын.