Әлмәттә полиция яңа туган баланы подъезда калдырып киткән хатынны тоткарлаган

Әлмәттә полиция Ленин урамындагы күп катлы йорт подъездында яңа туган баланы калдырып киткән Үзәк Азия илләренең берсеннән булган 55 яшьлек хатын-кызны тоткарлаган.

Хатын-кыз бу баланың үзенең оныгы булуын, аны 25 яшьлек кызының өйдә генә тапканлыгын таныган. Ачыкланганча, кыз бала, йөкле булуын белсә дә, акча булмау сәбәпле, өченче баласын үстерергә теләмәгәнлектән, хатын-кыз консультациясендә исәптә тормаган.

ТР Эчке эшләр министрлыгының матбугат хезмәтеннән «Татар-информ»га белдерүләренчә, хатын-кызлар яңа туган баланы якындагы хастаханәдә калдырырга карар иткәннәр.

Ләкин әби хастаханәдә кеше бик күп булыр дип уйлаган һәм баланы хастаханәгә якын булган йортның подъездында калдырып киткән, – дип хәбәр итә «Татар-информ»