Дусым авылын гөрләтеп балалар сабан туе узды

Балалар белән төрледән-төрле чаралар уздырып тора мәдәният җитәкчесе Альбина Хәкимова. Бу юлы зурлап алар өчен Сабантуй бәйрәме оештырды.

Бирнә җыюны да җиренә җиткергән клуб мөдире. Тормыш иптәшен дә эшкә «җиккән». Гармунны –  «колонка», атны – мотоблокка алыштырып бер төркем балалар белән бирнә җыйдылар.

Көне дә җылы, кояшлы, матур булды. Дусым клуб ишек алды мизгел эчендә чын Сабантуй мәйданчыгына әверелде дә куйды.
Бәйрәмне карарга әбиләр, бабайлар, апайлар, әниләр, бәбиләр дә килгән иде. Балалар да бик актив уйнадылар. 

Алмаз абыйлары тәмле итеп пылау да  пешерде казанда, килгән һәр кеше авыз итте. Мәйдан уртасы балаларның шат авазыннан чыңлап торды. Һәркем өчен дә авылча, рәхәт ял булды. 

Кунакка аю да килгән иде.

Сабан туена килгән әбиләр, балаларның күңелләрен күргән һәркемгә авыл халкы исеменнән олы рәхмәтләрен җиткерделәр.