Күшәр мәктәбендә ашханә яңартылды

Күшәр төп мәктәбендә дә күләмле эш башкарыла. Эш барышы турында мәктәп директоры Фәнис Хәкимҗановтан сораштык.
Махсус программа буенча мәктәп ашханәсе җиһазлары яңартыла һәм инженер сис­темалары алыштырыла. Җиһазлары гына зур суммага төшкән. Бу очракта без күзалларга өйрәнгән өстәлләр генә түгел, газныкы урынына яңа электр плитәләренә кадәр куела. Савыт-сабаны юып кую урынына кадәр каралган. Шулай ук электр җиһазлары, канализация дә яңартыла.

Ашханә персоналы өчен аерым киенү-чишенү, душ, бәдрәф бүлмәләре дә булдырыла. Бу хезмәтләр барысы да СанПиН таләпләренә туры китерелеп эшләнә.
Сер түгел, элек төп каршылык – нәкъ менә шунда була.

– Күпчелек таләпләр үтәлсә дә, әлегә 100 процент дип әйтеп булмый. Чөнки әле тикшерү килеп, объектны кабул итәргә тиеш. Әмма безнең өчен зур, мөһим ремонт булды бу, – дип сөенә мәктәп җитәкчесе.

Кыскача мәгълүмат 
Әлеге махсус программа нигезендә ел саен районыбызның берәр мәктәбендә ашханәләрне ремонтлау эшләре башкарылып килә. Күшәр төп мәктәбе чираттагысы.