Татарстан ветеринариясе этләрне мәҗбүри чиплаштыру турында искәртте

Бүген, Халыкара этләр көнендә, Татарстан Республикасы Министрлар Кабинетының Баш ветеринария идарәсе халыкка йорт хайваннарын чиплаштыруның мөһимлеге турында искәртте. Ведомствода билгеләп үтүләренчә, бу дата – хайваннарның сәламәтлеге һәм иминлеге турында уйлану өчен яхшы мөмкинлек.

Чиплаштыру - хайван тиресе астына дөге ярмасы зурлыгындагы микрочип кертү процедурасы ул. Аның уникаль идентификация номеры бар, әгәр эт югала икән, ул аның хуҗасын тиз арада ачыкларга мөмкинлек бирә. Чип ветеринария клиникаларында һәм приютларда җиңел укыла, бу хайванны өенә кайтару процессын тизләтә. Моннан тыш, күп кенә илләрдә аларның территориясенә кергәндә микрочипның булуы таләп ителә, бу йорт хайваннары белән бергә сәяхәт итүче хуҗалар өчен аеруча актуаль.

Чиплаштыру процедурасы махсус шприц ярдәмендә башкарыла, авырттырмый диярлек һәм нибары берничә минут вакытны ала. Шуннан соң чип керткән урынны күзәтеп торырга, актив уеннарны кичектерергә һәм этне берничә көн дәвамында суда коендырмаска, шулай ук халыкара базага кертелгән мәгълүматларның дөреслегенә инанырга кирәк. Республика ветеринария идарәсендә искәртүләренчә, чиплаштыру – җаваплылык кына түгел, ә хайванны реаль яклау чарасы да.

Белгечләр мәҗбүри теркәү срокларына аерым игътибар бирә. 2025 елның 1 гыйнварына кадәр туган барлык этләр шул ук елның 31 декабренә кадәр теркәлергә һәм чиплаштырылырга тиеш. Бу датадан соң дөньяга килгән көчекләрне беренче өч ай дәвамында чиплаштырырга кирәк. Сатып алынган хайваннарны теркәү өчен сатып алганнан соң бер ай вакыт бирелә.

2025 елның 1 июленнән Татарстанда закон таләпләрен үтәмәгән хуҗаларга карата административ чаралар күрелә башлады.

Татар-информ