Исәннәрнең кадерен бел, үлгәннәрнең каберен бел!

Бик олы мәгънә ята шушы сүзләрдә. Каберләрне чистартып, зиратларны тәртиптә тоту- исәннәрнең изге бурычы. Чөнки, һәммәбез дә, иртәме, соңмы, шунда барасы. Шуны истә тотып, без дә, ябынчылылар, 17 май көнне авыл зиратына җыелдык. 30-40 ел кул тимәгән бу урынга- картлар шулай ди. Дөрес, һәрбер нәсел үз туганнарының, әти-әниләренең каберләрен карап тора, әмма болай авыл белән дәррәү кубып...
Әйе, купты авыл, Казан, Биектау, Әтнә, Комыргуҗа... каян гына кайтмаган иде авылдашларыбыз. Берәү дә буш кул килмәгән, кем бензопила, кем балта, кем сәнәк, кем тырма, чүп тутырырга капчыклар, бар да бар. Яше-карты җиң сызганып эшкә кереште, берәү дә читтә калмады, 10 яшьлек Эдуард та, тугызынчы дистәсен ваклаган Нагорный бистәсеннән кайткан Илдус абый да тик тормады. Аварга торган агачларны кисеп, черекләрен капчыкларга тутырып, зират читенә чыгарып куя бардык. Транспорт булмас инде, дип борчыла башлаган идек. Рәхмәт, "Шахтер" хуҗалыгы рәисе Әнәс Абдул улы Хәкимов берсүзсез ярдәм итте, транспортын да бирде, үзе килеп хәлләребезне дә белеп китте. Аллаһының олы рәхмәтләре яусын Сезгә, Әнәс абый!
Эш вакытында куанып йөрдем. Харис абый берүзе яшәп яткан, беткән авыл, дип йөри идем Ябынчыны. Бетмәгән авыл, бетмәячәк! Шундый тырыш, бердәм халкы бар авыл бетәмени?!
Эш көн кичкә авышкан вакытта гына туктады. Ел саен майның өченче шимбәсендә җыелышып, өмә ясарга сүз куешып таралыштык. Бу гамәлне оештырып, башлап йөрүче Талия Зиннәтулла кызына, Ләйлә Илияр кызына, Фәрит Вәлиуллинга, шәхси транспортлары белән ярдәм иткән Баһавиевларга һәм ару-талуны белми эшләгән барлык ябынчылыларга олы рәхмәтемне җиткерәм. Ходай сезне ярдәменнән ташламасын, авылдашлар. Бу беренчесе, әмма соңгысы булмас, Алла боерса.

... Кайтып китәр алдыннан авыл урамнарын урыйм. Мәшһүр мәгърифәтче, дин галиме, тарихчы Шиһабетдин Мәрҗани туган нигезгә килеп чыктым. Ябынчының Шиһабетдине бит ул! Менә шуңа күрә генә дә җирле үзидарә җитәкчеләре шушы авылның ихтыяҗларына күбрәк игътибар итсәләр иде, авылны саклап калыр идек. Килер бер көн, туристлар килер төркем-төркем... Әмма монысы инде бөтенләй башка тарих.