Йөзләр арасында - Алия, Ралия, Илназ - безнекеләр бүләкләнде!

Бүген, 31 мартта, Казанда "Ярдәм" мәчетендә XXI "Сөембикә энеләре һәм сеңелләре" бәйгесе узды. Бәйгедә Татарстаннан һәм Россия төбәкләреннән йөзләгән бала катнашты.

Шул балалар арасында безнең Күңгәр мәктәбенең 5 нче сыйныф укучылары - Хәкимҗанова Алия, Гарипова Ралия, Шәрипов Илназ (укытучылары Галиева Суфия Мансур кызы) да бар иде.

Һәм алар йөзләгән бала арасында үзләренең белемнәрен күрсәтә алдылар. 36 номинациянең берсендә катнашып, сорауларга иң яхшы һәм дөрес җавап биргәннәре өчен, Алия белән Ралияне, әлеге бәйгене оештыручыларның берсе - Россия Федерациясе мөселман эшкуарлары ассоциациясе президенты Айдар Шахимәрдәнов Изге Коръән китабы белән бүләкләде. Ул гына да түгел, аларның һәркайсы, укытучылары Галиева Суфиия Мансур кызы да "Рәхмәт хаты" белән бүләкләнделәр. Сөбханалла! Аллага шөкер, безнекеләр дә сынатмады.

"Бик куанып кайттык", -диләр алар. Куанырлык кынамы соң, бик зур җиңү бит бу!

Ә хәзер чыннан да шулай икәнен аңлар өчен, түбәндәге (Казан, 31 март, "Татар-информ", Алмаз Шиһабетдинов) язманы укыгыз. Сүрия Мингатина.

Быел бәйге "Гаилә" мәчетендә узды. Бәйге Бөтенроссия "Мөслимә" иҗтимагый оешмасы, Россия мөселманнарының эшмәкәрләре ассоциациясе, "Гаилә" мәчете һәм Коръән өйрәнү үзәге ярдәме белән оештырылды.

Галим, профессор Хатыйп Миңнегулов балаларга туган телне белү әһәмияте турында да сөйләде.

"Сез үзебезнең халкыбызның тарихын, әби-бабаларыбызның гореф-гадәтләрен беләсез, тупланган рухи мирасларыбызны үзегезнең күңел хәзинәсенә әйләндерәсез икән, безнең халкыбыз яшәр. Без Ислам динендә булсак та, безнең үзебезнең телебез бар. Мин сезнең чын мәгънәсендә мөселман, чын мәгънәсендә татар булып, әби-бабаларыбызның васыятен алдагы буыннарга да җиткерүегезне телим", - диде Хатыйп Миңнегулов.

Бәйгегә Татарстаннан гына түгел, ә Россиянең башка төбәкләреннән дә катнашучылар килә. Самарадан килгән иман-мөхтәсиб Габдулла Мөхәммәткәрим "Татар-информ" хәбәрчесенә бәйгегә 20 гә якын бала алып килүе турында әйтте.

"Бу бәйгегә без 10нчы тапкыр киләбез. Бүген 20гә якын шәкерт алып килдек. Балалар бу бәйгегә бик теләп әзерләнә", - Габдулла Мөхәммәткәрим.

Бәйгенең алып баручысы Гамил Нур балалар белән уртак тел таба алды. Ул аларга кызыклы һәм эчтәлекле сораулар да әзерләп килгән. Дөрес җавап бирүчеләр истәлекле бүләкләр алды. Шулай ук, нәтиҗәләр ясалган вакытта, балалар, бергәләшеп, Коръән аятләрен укыдылар.

"Сөембикә энеләре һәм сеңелләре" бәйгесендә барлыгы 36 номинация иде. Катнашучылар Кол Гали, Кол Шәриф, Шиһабетдин Мәрҗани, Каюм Насыйри, Галимҗан Баруди, Габдулла Тукай, Исмәгыйль Гаспралы, Сөембикә, Мөхлисә Буби һәм башка шәхесләргә караган сорауларга җавап бирделәр.

"Сөембикә энеләре һәм сеңелләре" бәйгесендә 4 яшьтән 18 яшькә кадәр булган балалар катнашты.

Бирегә берничә йөз бала җыелганлыктан, казыйлар берьюлы берничә катнашучыны кабул итте. Әйтергә кирәк, кызларны һәм малайларны аерым бәяләделәр. Казыйлар катнашучыларга дингә һәм билгеләнгән шәхесләргә караган сораулар бирде, шулай ук Коръән аятләрен дә укытып карадылар.

Оештыручылар һәр катнашучыга да истәлекле бүләкләр әзерләп куйган, ә җиңүчеләр Диплом белән дә бүләкләнде.